Bojan Bogdanovic chuan point 30 a score a, a zarah Indiana Pacers chuan Cleveland Cavaliers chu hnehin 2-1 in hma an hruai.
Anni inkhelah hian Cleveland hi rin kai zawk an ni a, bul pawh an tan fuh zawk daih a. Half time a thlenin Cavaliers hian point 17 zetin hma an hruai hman a, mahse Pacers hi an harh thar a, an khingpuite hi an lehthal thei ta hlauh a, an series khelh laiah hian 2-1 in hma an hruai ta a ni.
Kum khat kalta khan Indiana Pacers hian Cleveland Cavaliers nen an inkhelh tumin half time-ah point 26 zetin hma an hruai a, an inpawhthlaktir tawh a, kum khat hnuah phuba latu zawkah an tang ve ta chiah a ni.
Vawi thum ngawt Eastern Conference champion lo ni tawh leh ni lai mek tan LeBron James chuan double-doubles 100 na a nei chiah a, Michael Jordan nihrual chiahin hetiang hlen chhuak thei player awm chhun an la ni a. James hian point 28 a score a, rebound 12 a la bawk a, a pawlte chu a chakpui zo ta chuang lo.
Wizards 122-103 Raptors
Bradley Beal chuan point 28 a score a, heng zinga point 21 chu first half chhunga a thun a ni a. All-Star John Wall chuan point 28 a thun a, assist 14 a nei bawk a, Washington Wizards chuan Toronto Raptors chu 122-103 in an hneh a. Chak lo zawk ni mahse Raptors hian Eastern Conference playoff series-ah 2-1 in hma an la hruai tho a ni.
Raptors hian a hmain 2-0 in hma an lo hruai tawh a, Wizards an chak ve takah chuan tlemin an inthlauhna a zim phah a. Regular season-ah pawh an inkhelh game 8 ah vawi 7 chu Wizards hi an chak lo a, an chak hi an lawm reng a ni.
DeMar DeRozan chuan Toronto tan point 23 a thun a, Kyle Lowry pawhin point 19 a score bakah assist 8 a nei bawk.
Bucks 116-92 Celtics
Khris Middleton chuan point 23 a score a, Giannis Antetokounmpo pawhin point 19 a thun bawk a, Milwaukee Bucks chuan Boston Celtics chu 116-92 a hnehin chak tlem zawk an la ni tho a, Boston hian 2-1 in hma an la hruai.
Eric Bledsoe leh Jabari Parker te chuan Bucks tan point 17 ve ve an thun a, backup center Thon Maker pawhin point 14 a thun bakah shot 5 chu a lo block a. Celtics tan Al Horford chuan point 16 a thun a ni.