Karim Benzema hi Arsenal pan tura sawi rik a awm reng a, France lama let leh tur anga sawi thawm a awm bawk.

Hetiang a nih deuh nuaih karah hian Real Madrid president Florentino Perez erawhin Benzema-a'n Real a chhuahsan a rinloh thu a sawi ve thung.

Season kal mekah Benzema hian La Liga inkhel tum 22 atangin goal 8 chiah a la khung a, season dang tluklo mahse Real Madrid president Florentino Perez erawhin a fak hle a, Zidane leh Brazilian Ronaldo chawhpawlh ang mai a tha a nih thu a sawi.

Real Madrid president Florentino Perez chuan ESPN kaltlangin, "Benzema hi Ronaldo leh Zidane chawhpawlh ang mai a tha a ni.

"No.9 position-ah amah aia tha khawvelah an awm lova, French player zingah a tha ber bawk.

"Kei chuan he hmunah hian a cham zel ka ring. A contract thar chungchangah erawh inbiakna a la awm lova, ka tihtur leh contract thar ziah chungchangah hian thuneihna pum hlum nei ila chuan football khawvela a cham chhung chu kan hnena awm turin ka thlung bet ang.

"Benzema chungah hian ka lawm em em reng a, a nungchang a that avangin ka ngaina hle bawk. Sawiselnate hian a tibuai ve lova, team tan a tangkai em em reng a ni, "tiin Benzema a fak hle.