Vawiin khan Ballon d'Or dawng thei tur player pathum puan an ni a, Cristiano Ronaldo, Lionel Messi leh Neymar te chu Ballon d'Or short list pathum an ni ta.
Short list 23 atangin mi pathum thlan chhuah an ni a, chung pathumte atang chuan Ballon d'Or winner thlanchhuah a ni thin. January ni 11, 2016 hian Zurich-ah 2015 FIFA Ballon d'Or winner puan a ni dawn, Ronaldo, Messi leh Neymar-te chu Ballon d'Or dawng thei pathum zingah an tel ta a ni.
A zawnin Messi leh Ronaldo-te hi kum 8 zet short list pathum zingah an tel tawh a. Messi-a'n he lawmman hi vawi 4 zet a dawng tawh a, Ronaldo hian vawi thum a dawng tawh bawk a. Kum hnih Ronaldo hian a zawnin a dawng tawh a, kumin hian tunge dawng ta ang ?
Neymar hi a vawi khat nan Ballon d'Or dawng thei pathum zinga a tel vawi khatna a ni a, Messi leh Neymar te hian season liamta khan La Liga title an lak bakah Champions League title an la a. Ronaldo erawh title la lo mahse amah mimal a khel tha tak zet a, kumin chhungin Ronaldo hian club leh ram tan goal 48 a khung, Messi pawh a che tha hle, thla hnih inhliam mahse kumin chhungin goal 48 a khung tling tawh bawk. Tunhnai hian Neymar a rawn khel tha hle a, La Liga top scorer ni mekin goal 14 lai a khung tawh nghe nghe a ni.
Mimal chet that dan leh club title lak ngaihtuah chuan Messi a awm hle niin khawvel chuan an ngai. Hetih lai hian Neymar pawh a che chhe lo. Amah ngei pawhin Ballon d'Or a phu thu a sawi chhuak nghe nghe a.
Neymar chuan,"Ka ngaihdanah chuan ka chet chhoh dan enin Ballon d'Or finalist zingah hian tel ve ka phu in ka hria.
"Finalist-ah keimah, Messi leh Suarez te nen kan pathum a kan awm theih chuan ka lawm hle ang a, kan thawhrah te en in kan pathum hian finalist a awm kan phu in ka hria" tiin a sawi.