Nimin atang Premier League season thar khelh tan a ni a, zaninah match lian kan hmu nghal dawna, Manchester City chuan Arsenal an tlawh dawn.
Arsenal hian kum 22 hnuah manager thar ruaiin, Unai Emery hnuaiah an Premier League game hmasa ber an khel dawna, champion lai City an hmachhawn nghal dawna, a awlsam dawn lo.
Spaniard manager pahnih an in tawng dawn a, Premier League champion lai hian Emirates Stadium-ah point thum an hlawh chhuak thei dawn em tih chu zaninah kan hre dawn.
Home team Arsenal tan Aaron Ramsey a fit hman tura beisei a ni a, ani hi dinhmun chiang lo reng a ni a, tun season bak Arsenal-ah contract a nei tawh lova, contract thar a la ziak lo.
Hliam na lutuk lo Ramsey hian a neia, training a zawm leh tawha, zanin hian a khelh theih ngei pawh a beiseiawm.
Arsenal captain Laurent Kocielny chu a la inhliam a, ani hi kum tawp lamah bak a rawn kir theih a rinawm lova, Kocielny bakah hian left-back Sead Kolasinac chuan hliam a neih avangin a khel thei dawn lo bawk.
Kocielny leh Kolasinac-te bak hi khel thei lo tur an awm rih lova, player thar Bernd Leno, Stephen Lichtsteiner, Sokratis, Lucas Torreira leh Metteo Guendouzi-te chuan pre-season tha takin an hmanga, starting-eleven chan ngei tumin an bei mek.
Arsenal hian goalkeeper thar Bernd Leno lalut mahse goalkeeper tawnhriat ngah zawk Petr Cech chu Emery hian a hman rih a rinawm zawk.
City tan Danilo leh David Silva an khel thei dawn lova, Danilo hi World Cup-a a inhliam kha a la dam lo. Silva hian City pre-season a khel lova, la enkawl mek niin a inhliam chhan tak hriat a nilo.
Zirtawp ni a press-conference-ah City manager Pep Guardiola chuan Raheem Sterling leh Kevin De Bruyne-te chu an khelh theih tawh thu sawiin, chawlh an hman zawh deuh chiah avangin anni pahnih hian inkhel bul an tan erawh a rinawm loh.
Community Shield-a City si ban nghaktu Claudio Bravo chu a khelh a rinawm tawh lova, first choice Ederson a khelh tawh ngei a rinawm. Bernardo Silva hian pre-season chhungin midfield-ah a khel tha hle a, zanin pawh hian midfield-ah a khelh a rinawm.
City player manto ber Riyad Mahrez pawhin a vawikhat nan Premier League-ah City kawr a hak ngei hmel bawk.
Predicted line-up :
Arsenal : Cech, Monreal, Sokratis, Mustafi, Bellerin, Torreira, Ramsey, Ozil, Mkhitaryan, Aubameyang, Lacazette
Manchester City : Ederson, Walker, Stones, Laporte, Mendy, Fernandinho, Gundogan, B.Silva, Sane, Mahrez, Aguero