2014-15 Premier League title chu Chelsea kutah an awm ta. Chelsea hian tun season an champion theihna turin player tha tak tak an nei nual, Hazard tluka pawimawh chu Fabregas hi a ni chiang mai.
Arsenal a chhuahsan khan Barcelona a pan a, Barcelona atangin England lamah a pem leh. Nipui bazarah khan Chelsea chuan an lalut. Chelsea-in an lak hma hian Arsene Wenger chuan Fabregas lak kir lehna chance tha zet a nei. Fabregas pawhin Arsenal-a kir leh a chak zia kan hria. Mahse Wenger-a khan midfielder nei tha tawkin a inngai a, Fabregas a hnawl ta niin report chuan a tarlang.
Chu veleh Jose Mourinho a rawn lang nghal vat a, a rang a rangin Spanish midfielder hi Mourinho chuan Stamford Bridge-ah a seng lut nghal hmak. Arsenal-a a khelh chhung zawngin Fabregas Premier League title a la lo, Chelsea-ah season khat pawh a khelh tlin hma hauhvin title an la ta der mai.
Cesc Fabregas hian tun season English Premier League-ah assists 17 nei tawhin, ani aia assist nei hnem an awm lo. Europe-a club lian panga zingah pawh Top 3-ah a lang vang mai. Kevin De Bruyne (Wolfsburg) chuan assists vawi 19 nei tawhin, Lionel Messi chuan vawi 18 a nei a, anni pahnih chauh hi Fabregas hian a phak lo a ni.
Tun season Premier League-a Chelsea tana player khel tha ber chu Eden Hazard a ni kan ti thei awm e, PFA award pawh a dawng nghe nghe a nih kha. Opta chuan Hazard hi 7.99 rate a pe a, a dawt chiahah Fabregas awmin 7.68 rate a hmu a ni.
Fabregas hian Chelsea tan minute 2771 a khelh chhungin 85.6 % a pass dik a, average pass 82.8 lai a nei. Hetih lai hian Hazard erawh chuan average pass 56.6 chauh a nei a, Hazard hi chuan goal a khung nual avangin a langsar fal nalh kan ti thei awm e. Fabregas hian Diego Costa goal khung tam tak hi a siam sak a ni.
Pathianni zana Crystal Palace si khat faia an hneh hnu khan Premier League champion an ni tih a chiang ta a. Inkhelh zawhah Skysports-in a kawm naah Fabregas chuan."Chelsea hi chak duh thinlung pu club a ni a, he pressure na tak hian chak turin min nawr a, he nawrna na tak hi ka ngainat zawng a ni. A hlimawm a, sawifiah thiam a har khawp mai. Hun rei tak kan nghak a, tunah chuan kan thaw ta huai mai. Kan inchhuang em em a, tunah chuan party hun a ni ta," tiin a sawi.