3rd B.Lalthlangdika Memorial Open Arm Wrestling Championship 2016 chu December ni 16 chawhma dar 11:00 khan Engineers Club, Babutlangah tan a ni a, Mizoram hmun hrang hrang atangin players 60 chuang an tel.
He championship hi hun rei tak Mizoram Arm Wrestling Association hruaitu lo ni tawh leh tuna Mizoram Wrestling Association President ni mek Pu Ngurthanmawia chuan a hawng a, Arm Wrestling chu pian phunga rualban lo infiammite tan malsawmna a nih thu leh an puala intihsiakna buatsaih thin game tlemte zinga mi an ni a ti. Khuallian chuan Mizoram Arm Wrestling Association-in nasa taka hma a sawn thu leh sports hmasawnna tura an hruaitute hmalakna a fak a, an kalzelna turah duhsakna a hlan bawk.
Open Championship anih angin mipa leh hmeichhia a hranga inelna buatsaih bak weight category then a ni lova, mipa champion leh hmeichhe champion an zawng tawp dawn a ni.
Mizoram Arm Wrestling Association President PB Vanlalremruata chuan he championship-a tithate chu kum 2017-a Delhi-in India ram pum huap arm wrestling championship a thlen turah Mizoram aiawh tura an thlan dawn thu a sawi bawk.
3rd B.Lalthlangdika Memorial Open Arm Wrestling Championship 2016 results:
Mipa
Gold : Denis Lalruattluanga
Silver : R.Lalhriatchhunga
Bronze : VL Zothansanga
Hmeichhia
Gold : K.Lalhriatpuii
Silver : Lalsangzuali
Bronze : Biakhlupuii