Anti-doping regulations an bawhchhiat avangin Football Association chuan Premier League club West Ham chu a hrem dawn niin a lang, hetih lai hian West Ham hian insawifiahna hun February ni 27 thleng an nei a ni.
Thla 12 chhungin West Ham chuan an player chungchang vawi thum lai report hunah an report lo niin FA chuan thu a chhuah a, insawifiahna hun tlemte an nei mek a ni.
Player ten damdawi an hman leh hman loh chungchang test kimchang neihpui an ni thin a, hemi report hi a hun takah thehluh thin tur a ni, hei hi West Ham chuan vawi thum lai an lo ti lo nia sawi a ni.
West Ham thupuangtu chuan dan bawhchhiat chungchang chu player-te thiam loh ni lovin club thiam loh niin a sawi. Engtiang chiahin nge hremna an lek dawn tih erawh sawi theih a la ni lo.