Roy Jones Jr chuan boxing khawvela kum 29 chhung a in hman hnuin inhnek a chawlhsan tih a puang a, ring chhunga a kir leh theihna awmchhun chu UFC fighter Anderson Silva a hmachhawn dawn chauhin a ni tawh tih a sawi.

Kum 49 mi Jones hian Ningani khan an khua Florida-a Pensacola Bay Center-ah Scott Sigmon a hneh a, unanimous points hmangin hnehna a chang.

Hnehna a chan hnuin Jones chuan, "Zanina minlo țawiawmtute zawng zawng chungah lawmthu ka sawi e. Scott hi hmachhawn a hautak dawn tih ka hresa a min nawr dawn tih pawh ka hre lawk.

"Chhuanlam siam duh lo mah ila kar liamta khan ka banpuam veilam hi ka ti hliam. Hliam nei mah ila Pensacola-a ka inhnekna hnuhnung ber anih dawn avangin ka inhnukdawk duh lo." tiin a sawi.

Weight palia world champion ni tawh hian hrem tawk mek Anderson Silva a chozui a, kum 42 mi Anderson hi damdawi hman phalloh a hman avangin hrem mek a ni.

Jones chuan, "Roy Jones hi ring chhunga a kir leh theihna tur chu kawng khat chiah a awm. Chumi chu a thlenloh chuan thawnthu a tawp a ni mai." tiin Anderson a chozia a tilang.

American boxer Jones hian kum 1989 May thla khan professional huang chhunga a match hmasa ber a khel a, match 66-ah chakin vawikua a tumpuite a hneh lo tawh bawk a ni.