Club dangin an player an dawr danah Monaco leh Barcelona te chu an lungawi lo hle a, Monaco chuan FIFA hnena zualko hial pawh an duh thu an sawi.

PSG chuan Barcelona foward Neymar chu a release clause £195million pek an huam. PSG hian Neymar chu a mimalin an bia nia sawi a ni a, Brazil lam chanchinbute chuan Neymar hian PSG zawm a duh niin an sawi hial.

Barcelona president Josep Bartomeu chuan, "Ani hi hralh tumna kan nei lo. Kum 4 chhung atan contract kan hnenah a ziak, kan hnenah a awm zel dawn.

"Chutianga leichhuah mai mai theih a ni lo, PSG hian an lei a nih ngat chuan Financial Fair Play dan an palzut ngei dawn," tiin PSG a chhang let.

Kylian Mbappe pawh club lianin an hel mek a, club be hmasa lovin amah mimal an bia nia sawi a nih avangin Monaco an lungawi lo hle.

Monaco chuan heng club lian hovin an player an biak dan chu duh lovin, FIFA dan an bawhchhia niin an sawi a, FIFA hnena zualko mai pawh an hnial lo niin thu an chhuah.

Mbappe hi Real Madrid, PSG, Arsenal leh Manchester City-ten a rukin an dawr nia report a ni a, Monaco hian chhuahtir an tum rih lo, pre-season tour-ah pawh an hruai nghe nghe a ni.

Liverpool pawhin Southampton defender Virgil van Dijk chu a rukin an lo dawr a, club phalna tel lova an lo dawr avangin Saints an lawm lo, Premier League hotute hnenah an zualko a, Liverpool khan ngaihdam an dil nghe nghe a nih kha.