McDowells No 1 Soda Mizoram Premier League Round 6 khelh zawh a ni ta a, hmahruaitu Aizawl FC chuan 2-1 in Mizoram Police FC an hneh a, MPL 4-ah hma an hruai chhunzawm zel.
Khelh 6 atangin Aizawl FC hian points 15 an hlawh chhuak ta a, Chanmari FC-in si khat faiin Dinthar FC an hneh loh avangin point thumin Aizawl FC an fal ta a ni. Aizawl FC tan Alfred Kemah Jaryan chuan goal hnih a khung a, Mizoram Police FC tan V. Laltanpuia chuan goal khat a khung ve a ni.
Mizoram Police FC 1-2 Aizawl FC
(V.Laltanpuia 26') (Alfred Kemah Jaryan 8', 81')
Mizoram Police FC XI : Andrew, B. Sena, Amuana, I-tana, Ropuia, Mamawitea, Francis, Tri-a, Lawma, Fakzuala, Ruatpuia
Aizawl FC XI : Poirei, Ruatthara, Chullova, Ronald, Zuala, MKA, BTA, David, Albert, Alfred, William
Goal a luh hma hle, tan atanga minute 8-na lekah Alfred chuan Aizawl FC goal khatna a khung. William-a chest thlak chu box pawn atangin Alfred chuan a ke veilam chuan kawh takin a shot a, Mizoram Police FC goalkeeper Andrew-a veilam sir takah a thlawk, a goal chiang hle.
He goal hi V. Laltanpuia chuan 26th mins-ah Mizoram Police FC tan a rul a, Mizoram Police FC-in free kick an hlawh chhuak a, hla tak atanga Lalhmunmawia pet chu box chhunga awm V. Laltanpuia chuan a tauh goal, half time a nih chuan 1-1 in an inhnehtawk.
An inhnehtawk tawh dawn emaw tih laiin hun tawp dawn minute 10 la awmin set piece atanga MSA ball vawrh tha tak chu Alfred chuan mawi takin a tauh goal leh a, goal dang a lut tawh lo, 2-1 in Alfred-a goal hnih hmangin Aizawl FC chuan hnehna an chang ta a ni.
He match-ah hian Aizawl FC Poirei a che tha a, hna a nei nual, Lalfakzuala shot tha takin a lo dang a, Lalramthara free kick tha takin a lo dan sak bawk. Mizoram Police FC goalkeeper Andrew-a pawhin goal hnih chhuah mahse a save te erawh a ropui. First half-a David-a shot tha tak a lo dante kha ropui tak a ni.
Mizoram Police FC hi team chhia an ni ngai lo. Tun season-ah erawh an che tha lo hle, season dang an tluk lo. Chutih laiin team lian an hmachhawn thei zek a, Aizawl FC pawhin an chei hleithei lo. Mahse I-League Club nge nge kan ti leh thin a nih hi, champion lai Aizawl FC chuan point 3-in Chanmari FC an tlansan leh ta a ni.