November ni 28 khan Champion lai Aizawl FC chuan East Bengal an tlawh a, 2-2 in an inhnehtawk. January ni 16, 2018-ah Rajiv Gandhi Stadium-ah an inhmachhawn leh a, hetah pawh hian an inhnehtawk leh bawk a ni.

Hero I-League a Aizawl FC champion puitu Khalid Jamil chuan East Bengal a zawm chhan chu Aizawl FC hotuten an chhuahtir vang a nih thu a sawi avangin Aizawl FC supporter-te Khalid Jamil-a chungah an lungawi lo hle a, dawt sawi nia an ngaih avangin FIR an thehlut a, Press Release an chhuah hial nghe nghe. Hemi avang hian match pawh a tang hle nghe nghe a ni.

Rajiv Gandhi Stadium-a goal awm lova an inhnehtawk tum hian Aizawl FC goalkeeper Avilash Paul chu Hero of the Match atan thlan a ni a, khelh 8 atangin Aizawl FC hian point 14 an hlawhchhuak a, anni aia game khata khel tam zawk Shillong Lajong FC nen point 14 ve ve neiin Aizawl FC hi pangana an ni a, Shillong Lajong FC hi palina an ni. Aizawl FC hian game 9 khel tawh hmahruaitu Minerva Punjab chu point 8 in an thlau mek.

Aizawl FC 0-0 East Bengal

Aizawl FC XI : Avilash Paul, Masih Saighani, Dodoz, Albert, Kareem Nurain, Alfred, Andrei, Dinliana, C. Lalrosanga, Hmingthanmawia, William Lalnunfela

East Bengal XI : Barreto, Arnab Mondal, Chullova, Amna, Katsumi, Armand, Eduardo Ferreira, Danmawia, Jobby Justin, Salam Singh, Prakash Sarkar

Goal lut lo mahse game hmuhnawm tak a ni a, team hnih te hian chance an nei ve ve a, clear chance erawh an nei lo ve ve. First half-a Alfred-a shot chu a goal teuh hle a, box pawn atanga lei hrula a shot chu East Bengal goalkeeper Barreto chuan a lo save tha kher mai. Dodoz pawhin box veilam sir atangin a pet goal teuh hle bawk.

First half-ah East Bengal-in chance hlauhawm vawi hnih vel an nei, Danmawia cross atangin near post-a lo awm Jobby chuan chance tha tak a nei a, mahse Aizawl FC goalkeeper Avilash a lo inrawlh hman hlauh. Second half-ah Dinliana corner pet chu a kual lut teuh hle a, East Bengal goalkeeper Barreto chuan a lo beng per chhuak tha kher mai.

Aizawl FC midfielder hlui Brandon-a chuan second half minute 18 a la awm tihin goal a khung teuh hle a, box pawn atanga a shot tha zet chu Aizawl FC goalkeeper Alvilash chuan a lo nam over hman a. Bench atanga rawn lut Aizawl FC forward Mapuia chuan hun tawp dawn tak takah chakna goal khung theihna chance tha tak a nei a, free ball tha tak chu a la sir lutuk a, goal zawnah a pet thei lo hlauh bawk.

Team hnihte an inbei tawk hle a, foul pawh a awm nual bawk. Midfield-ah an inbeitawk hle a, Aizawl FC tan Alfred a tangkai leh hle, goal hnaihah a tawlhphei avangin shots pawh a nei nual, midfield-ah an indangchat tawn a, goalkeeper pahnihte an chetha ve ve hle bawk.

Aizawl FC hian ball posessions 58% an nei a, shots vawi 17 neiin goal zawna kal erawh vawi 4 a ni. East Bengal lamin shots vawi 12 an nei a, goal zawnah vawi 7 a kal. East Bengal chuan game 10 khel tawhin hmahruaitu Minerva chu point thumin an phak lo mek.