Mizoram Premier League Season 6 Round 3-na chu khelh zawh a ni a, match hnuhnung berah I League Champion Aizawl FC leh Chhinga Veng 2-2 in anin hneh tawk.
September ni 15, 2017 (Zirtawpni) zan inkhel hmuhnawm takah AIzawl FC tan K Lalthathanga leh Jonathan Lalrawngbawla chuan goal khat ve ve an khung a, Chhinga Veng tan Malsawmfela chuan goal khat a khung a, Achi-a chuan an lamah a tauh goal hlauh bawk. He inkhelah hian Chhinga Veng keeper Zothanmawia chu Man of the Match-ah thlan a ni.
Aizawl FC 2-2 Chhinga Veng FC
(K Lalthathanga 19', Jonathan Lalrawngbawla 49') (Malsawmfela 7', Lalhriatrenga 37' (Achi-a OG)
I League Champion hian season bul tan tha lo mahse, Portuguese coach Paulo Menezes enkawlna hnuaiah passing game rang tak an khel a, Liberian midfielder Alfred Kemah Jaryan leh defender Kareem Omolaja chuan inkhel bul tan mahse, hnehna an chang zo lo. AIzawl FC hian Ramhlun North FC leh Chanmari FC an draw hnuah Chhinga Veng nen in hneh tawk leh in khel tawhah point 3 an nei tawh a ni.
Mizo hlang awmna Chhinga Veng FC hian coach Sangzuala Hmar enkawlna hnuaiah hneh loh an la tawng lo a, Mizoram Police FC an hneh hnuah Chanmari West an hneh leh a, Aizawl FC nen inhneh tawk thungin khelh tawhah point 7 hmuin table hmahruaitu an ni leh ta a ni.
Inkhel tan a ni a, Chhinga Veng chuan nawr nghalin minute 7-ah Sawmfela chuan goal hmahruai a khung a, he goal hi free kick atangin a thun a ni. Aizawl FC chuan nawr let ve thungin minute 19-ah mual dinglam sir a tang a Rochhara ball vawrh tha zet chu K Lalthathanga chuan goal-ah chantirin an siphurh a rul.
Chhinga Veng chuan an huntha neih hmang tangkaiin minute 37-ah mual dinglam sir a tang a Vanlallawma ball vawr chu Achi-a chuan an lamah a tauh goal hlauh a, Chhinga Veng chuan 2-1 in hmaanhruai thung.
Chhinga Veng chuan nawr chhunzawmin Dampuia goal shoot tha zet chu Aizawl FC keeper Avilash Paul chuan a dan sak hnuah Sawmfela chuan goal thun belhna hun tha a hlah.
Aizawl FC chuan an siphurh sut tumin an nawr let a, Rochharzela leh Jonathana chuan an siphurh sutna hun nei mahse, Chhinga Veng keeper T Mawia tan hna hautak erawh an siam lo. Goal luh belh lo in Chhinga Veng chuan 2-1 a hmahruaiin chawlh lawk an hmang ta a ni.
Second half-ah Aizawl FC chuan an nawr nghal a, minute 4 aral hmain mual dinglam sir a tang a, Rochharzela ball vawrh tha zet chu Jonathan-a chuan tauh goal-in an siphurh a rul thung.
Chhinga Veng coach Sangzuala chuan MS Dawngliana, Dingngheta leh Apuia te luh tirin an goal nawr ana sawt a, Msa chuan goal thunna hun tha a hlah. Aizawl FC tan Mka, William-a leh Dawngtea te rawn lut ve bawkin Mka leh Alfred chuan goal thun belhna hun tha an hlah ve bawk.
Huntawp dawnah Chhinga Veng tan Sawmfela free kick tha zet chuan goal kham aper hlauh a, Aizawl FC an him hram; goal luh belh tawh lo in 2-2 in anin hneh tawk ta a ni.
Aizawl FC hian September ni 18, Thawhtanni tlai 3:00-ah Chanmari West FC an hmachhawn leh ang a, Chhinga Veng FC hian September ni 18, Thawhlehni tlai dar 3:00-ah Bethlehem Vengthlang FC an hmachhawn thung ang.
(adsbygoogle = window.adsbygoogle || []).push({});