October ni 19, 2017 (Ningani) khan Mizoram Premier League Season 6 Round 9-naah I-League Champions League Mizoram Premier League Champions an inhmachhawn a, I-League Champions Aizawl FC chuan 3-1 in hnehna an chang.

Chanmari FC chuan MC Malsawmzuala hmangin hma hruai mahse William-a chuan Aizawl FC siphurh a rul a, Romanian midfielder Andrei Ionescu chuan Aizawl FC hma a hruaipui, second half-ah William-a chuan Aizawl FC goal thumna a khung leh a ni. He match-ah hian Romanian midfielder Andrei Ionescu chu man of the match-a thlan a ni.

Tun season-ah team hnihte hi an lo inhmachhawn tawh a, khami tum khan 1-1 in an inhnehtawk. Aizawl FC hian tun season bul tan tha lo mahse an insiamtha chho zel a, team khawng ber zing ami Chanmari FC chu 3-1 in an hneh ta a ni. He match-ah hian MK-a chuan goalkeeper a chip khum a, goal line atangin Chanmari FC defender ten an clear, a goal ngei niin lang mahse linesman chuan goal-ah a phar lo a ni.

Portugiese coach Paulo Meneses hnuaiah Aizawl FC hian vawi thum hnehna chang tawhin vawi li draw an nei a, vawi hnih an tlawm a, point 13 neiin table-ah palina atangin pahnihnaah an lawn chho ta. Chanmari FC hian match kua atanginpoint 12 an nei mek a, table-ah pathumna an hauh thung.

Aizawl FC 3-1 Chanmari FC

(William Lalnunfela 33', 65', Adrei Ionescu 37') (MC Malsawmzuala 20')

Chanmari FC hian 20 mins-ah MC Malsawmzuala hmangin penalty atangin goal an khung, si khat faiin hma an hruai. 33 mins-ah H. Lalmuankima through ball pek tha zet chu William Lalnunfela chuan box chhungah umlutin a pet goal. He goal a luh atanga minute lina lekah Andrei chuan Aizawl FC hma a hruapui. MK-a siam bawk niin, hemi tum hian Aizawl FC tlar hma ten Chanmari FC tlar hnung an thiat mawi hle nghe nghe a ni.

Second half 65 mins-ah William-a chuan a goal hnihna leh Aizawl FC goal thumna a khung a, box dinglam sir atangin Andrei chuan lei hrulah ball a cross, far post-a lo awm William chuan awlsam takin a pet goal. Hun tawp dawnah MK-a chuan Chanmari FC goalkeeper a chip khum, hei hi a goal hman niin lang mahse linesman chuan goal-ah a phar lo.

Aizawl FC game a tha hle a, goal dang pawh khung thei dinhmunah an ding, Chanmari FC goal bar te an pet per bakah Chanmari FC keeper MS Dawngliana chuan hun tawp dawnah Andrei-a shot tha zet a lo save bawk a ni.

October ni 24, Thawhlehni tlai dar 3:30-ah Aizawl FC hian Bethlehem Vengthlang FC an hmachhawn ang a, Chanmari FC hian chumi zan dar 7:30-ah Chanmari West FC an hmachhawn thung ang.

Reporter : PC Lala