​ADFA leh Haier an thawk dun, ADFA 1st Div League a piang ta

07th September 2015, 11:09PM

Aizawl District Football Association leh Haier Company (India) te chuan vawiin 7th Sept 2015 (Thawhtanni) thawk dun turin inremna thuthlung Agriculture Directorate Conference Hall-ah an ziak.

Inremna thuthlung an ziahna hmunah hian ADFA leh Haier lam mi pawimawh te an kim hle a, Haier leh ADFA te hian kum hnih chhung atan ADFA 1st Division League ropui tak an buatsaih dawn a, ADFA President Pu Robert Romawia Royte chuan he function hi kaihruaiin, leh ADFA 1st Division League Organising Committee Chairman leh ADFA Hony. Secy. ni bawk Pu Vanlalrawna leh Haier Company (India) aiawh Manager Debajit Sen-te chuan inremna thuthlung an ziak ta a ni.

League hi 2015-16 season atanga tan tur a ni dawn a, ADFA 1st Division League tih a ni ang. ADFA President chuan Company lian Haier te nen an thawk ho ta chu lawmawm a tih thu a sawi a, thawh hona tha tak an neih chhoh zel a rin thu a sawi bawk a ni. Haier Company (India) Manager Debajit Sen pawhin ADFA nen thawh hona tha tak an neih theih avanga a lawm em em thu le player naupang tak takte talent pho chhuahna tura ke an pen chu an lawm thu a sawi a ni.ti a ni.

Haier Company (India) hian kum khat atan cheng nuai riat (8) in ADFA 1st Division League hi an sponsor anga, player ti ṭhate lawmman Haier hian a siam dawn bakah League khelh hun chhung hian Haier Company hian special scheme customer-te tan a siam dawn bawk a ni. ADFA 1st Division League Organising committee lam pawhin sponsor tu tur an zawn belh zel a, 1st Division League hi Zonet Cable Network-in Local Channel a en theih turin an broadcast ṭhin dawn bawk a ni.

ADFA 1st Division League hi duan lawk ang chuan October ni 5-ah ṭan tum a ni a, ADFA hnuaia 1st Division Club pariat (8) AFC Football Academy, Chaltlang FC, Chawnpui FC, Chhinga Veng FC, Electric Veng FC, FC Kulikawn leh Ramhlun ‘N’ FC ten an khel ang. Inkhelh hi Home leh Away a khelh tur a ni a, club tin te vawihnih ṭheuh an intum anga, inkhel a chak zawkin point 3 an hmu zel anga, team pahnih te an in hnehtawk chuan point 1 veve an an hlawh anga, chaklo team in point an hmulo ang. Club pahnih point inang hmu an awm anih chuan “head-to-head” lak tur a ni a, heng club te hi an in draw a nih chuan “away goal” rule hman tur a ni ang. 

picture credit : adfa

(adsbygoogle = window.adsbygoogle || []).push({});

Copyright © inkhel.com 2024. All rights reserved.