Barcelona chuan 3-1 a Alaves hnehin a zawnin Copa del Rey-ah vawi thum an champion ta a, Luis Enrique chuan kum thum Barcelona a enkawl hnuah a match hnuhnung ber a khel bawk a ni.
Vicente Calderon Stadium-a final match-ah goal hmasa ber hi 30 mins-a lut a ni a, Neymar-a pass chu Messi chuan box pawn chiah atang chuan mawi takin a thuai goal.
Barcelona 3-1 Alaves
(Messi 30', Neymar 45', Alcacer 45') (Hernandez 33')
PLAYER RATINGS (data source : opta)
Barcelona - Cillessen 5, Mascherano 4, Pique 5, Umtiti 6, Alba 7, Rakitic 6, Busquets 7, Iniesta 6, Messi 8, Alcacer 7, Neymar 7. Subs - Gomes 7, Vidal 5.
Alaves - Pacheco 7, Femenia 6, Rodrigo 6,, Vigaray 5, Feddal 6, Theo 7, Llorente 7, Manu 6, Gomez 6, Mendez 5, Deyverson 5. Subs - Romero 5, Camarasa 5, Sobrino 5.
Barcelona hian hma an hruai rei lo, 33 mins-ah Hernandez chuan free kick mawi takin top corner-ah a thlawh lut a, Alaves si phurh a rul. First half tawp dawnah Barcelona chuan goal hnih an khung thawt.
Box dinglam sir atanga Ander Gomes cross tha zet chu Neymar chuan goal-ah a chantir. Hemi hnu chiah hian Messi chuan mawi takin ball a khalh a, Francisco Alcacer tan a pe, ani hian goal-ah a chhuih lut chhunzawm a, 3-1 in Barcelona chuan hnehna an chang ta a ni.
Messi chu Athletic Bilbao forward Telmo Zarra hnua Copa final -a goal 4 khung thei leh hmasa ber a ni. He match-ah hian Suarez chu hrem a nih avangin a inlan thei lo nghe nghe a, inlan ngat selang chuan hei aia tam goal an khung ngei a rinawm.
Champion mahse Barcelona lawm a kim lo, an defender Mascherano chu Marcos Llorente nena an inchuhnaah a hliam a, zawn chhuah a ni, engtiang chiaha na nge tih erawh a la hriat lo.
Champions League quarter final atanga hnawhchhuah an nih hnuah La Liga title an chang lo leh. Barcelona chuan demostic cup an chawi ta hram a, trophy nen season an khar ve ta a ni.
Luis Enrique hian Barcelona a enkawl chhungin game 181 khelin, vawi 138 a chakpui a, vawi 22 a inhnehtawkpui bakah vawi 21 a chakloh pui bawk. Season thum a enkawl chhungin Enrique hian Catalan club hi trophy 9 lai a chawipui.
Lionel Messi chuan career game 700-na a khel tling ta a, goal 565 khung tawhin, trophy 30 a chawi tawh bawk a ni.