Antonio Conte nen in hmu thiamlo ni a sawi Spain striker Diego Costa chuan Chelsea squad-in chawlh an neihlaiin Cobham training ground-ah training a nei.

Chelsea hian Inrinni zan khan King Power Stadium-ah 3-0 in Leicester City an hneh a, player-te hnenah ni hnih chawlh pek an ni.

Foxes an hmachhawn țumin Costa hian a khel lo va squad-ah a tel lo hrim hrim bawk. Atletico Madrid striker hlui hian hnungzang hliam vangin Leicester hi a hmachhawn lo niin sawi mahse training-naah The Blues manager Conte nen an in hmu thiamlo bawk niin Sky Sports chuan an tarlang.

Chinese Super League club Tianjin Quanjian nena sawizawm mek Costa hian Premier League season kal mekah goal 14 khungin midang pet goal tura siamsak vawinga a nei tawh a, Conte bakah Chelsea neitupa Roman Abramovich pawhin kum 28 mi hi chhuahtir a tum lo hrim hrim niin sawi a awm.

London club hian tun thlasik transfer hun kal mekah Oscar leh Mikel John Obi-te China lamah an chhuahtir tawh a, kum 2020 thleng daih contract la nei Costa hi chu chelhbeh an duh niin Sapram chanchinbute'n an ziak.

Chelsea hian Thawhlehni ațangin training an chhunzawm leh dawn a, Costa hliam hi medical team lamin an endik reng bawk a khelmuala a kir leh theih hun tur ala sawichian theihloh.