A goal celebrate-naah Ronaldo a inhliam

05th December 2021, 01:12PM

Manchester United forward chhuanvawr Cristiano Ronaldo chu Arsenal laka a goal thun a celebrate-naah a inhliam avangin zanin hian Crystal Palace lakah a inlan thei lo maithei.

Michael Carrick-a enkawlna hnuaia an game hnuhnung berah kar liamta khan Manchester United hian Arsenal chu 3-2 in an hneh a, he inkhelah hian Ronaldo hian goal hnih a thun.

Ronaldo hian goal a thun hian a celebrate dan pangngaiin ‘siu’ celebration a ti leh a, hetah hian a khup a ti na palh niin chanchinbu mite chuan an tarlang.

Ronaldo hi 88mins-a lakchhuah a ni a, a kal dan a dik chiah lo niin a lang a, dug-out lamah pawh thu lovin tunnel lam a pan tlang nghal a ni.

Zanin hian Manchester United hian an interim manager thar Ralf Rangnick-a hnuaia an game hmasa ber an khel dawn a, Old Trafford-ah London club Crystal Palace an lo mikhual dawn.

German manager Rangnick chuan United manager anga a game hmasa berah Portugal captain Ronaldo a chhawr thei lo maithei a, United hian goal khung an harsat phah leh dawn em tih chu zaninah kan hre dawn a ni.

Arsenal lakah Ronaldo hian a career-a a goal 800-na leh 801-na a khung a, he inkhel hi Rangnick chuan stands lam atangin a thlir a, inkhelh zawhah kum 36 mi Ronaldo inkhelh dan chu Rangnick hian a fak zui nghe nghe a ni.

Copyright © inkhel.com 2022. All rights reserved.