Reserve team-a a khelh duh loh avangin Van Gaal chuan Victor Valdes-a tan Man Utd-ah hmun a awm loh thu sawiin, hralh chhuah a nih chhunzawm tur thu a sawi bawk.
Kum 33 mi Spain International hi Manchester United-in US lama Pre-season tour an neih naah squad-ah an telh ve lova. Seattle-a an player lei thar Bastian Schweinsteiger, Morgan Schneiderlin leh Matteo Darmian-te interview neih naah Van Gaal thuchhuak vein, Valdes-a kal ve loh chhan an zawhna chu,
"Ka kalphung a zawm lova, hetiang mi hi chuan kan hnenah hmun a chang ve lo. Kan dan zam te zawm theilo tan chuan tih tur awmchhun chu chhuah mai a ni. A zialo ka ti hle a, dik tak chuan insiam thar lehna hun tha kan pe a, contract thlengin kan pe. Tichuan tunah a fit leh ta a, Hull City ka hmachhawn tir a, mi hrethiam thin tak ka nih avangin pui ka tum kha a ni si a," tiin Van Gaal chuan a chhang.
January thla khan Manchester United chuan inhliam vanga rei tak a chawlh hnuah Barcelona-ah contract a chhunzawm lova, free-in chona thar hmachhawn turin Old Trafford lam a pan ta a, contract puitling an pe chhunzawm bawk. Season liamta khan Under 21 team tan khelin Liverpool, Chelsea leh Spurs te a hmachhawn a. Valdes hian United league match hnuhnung berah Hull City a hmachhawn bawk a ni.
Valdes chhuah tir an tum tak siah chuan Real Madrid-in an rim mek Dea Gea chungchang an zawhna chu,"Ka sawi mai thei lo, a zia hi a ropui lutuk, chutih laiin hetiang zawhna inzawh erawh a atthlak hle mai." tiin Van Gaal chuan a sawi a, hetih lai hian Dea Gea an chan hloh a nih erawh chuan goalkeeper tha an ngaihtuah tur thu a sawi tel bawk.
Van Gaal hi Di Maria chungchang pawh zawh a ni bawk a, PSG nena an indawrna chu a sawi chiang duh lova, chutih laiin indawrna erawh a awm niin a sawi zauh bawk. Hunin a la hril tur thu a sawi rualin tun dinhmunah chuan Manchester United mi leh sa a nih mek thu a sawi tel bawk a ni.
picture credit : Matthew Lewis