01 Feb 2018 10:30

inkhel

2018 World Cup: India ațangin Russia-a zin a hautak dawn em?

Khawvela ennawm ropui ber (The Greatest Show on Earth) an tih FIFA World Cup khelh kum a ni leh ta a, a boruakin min țham leh țan tawh a World Cup khel tur player-te tan bik lah hliam na tak neih a pawi thui thei tawh bawk.

2018 World Cup hi Russia-in an thleng dawn a, June ni 14 leh July ni 15 inkar hian khelh a ni ang.

TICKET AN SIAM HNEM

Kum dang ang bawkin ticket an inchuh leh luih luih tawh a, FIFA chuan ticket 159,402 an siam a an website ațanga lei vek tur a ni thung.

World Cup-ah hian inkhel (match) 64 a awm dawn a, khawpui hrang hrang 11-ah khel tur niin khelmual 12 hman a ni ang.

Ticket hi zawrhchhuah tawh a ni a, March ni 13 leh April ni 3 hian zawrhna hun siam leh tur niin a tawpna ber chu April 18 leh July 15 inkarah neih leh a ni ang.

Group stage china ticket man tlawm ber hi $105 man niin India pawisa chuan Rs. 6,720 man vel a ni a, final-a ticket manto ber erawh $1,100 man niin India pawisa chuan Rs. 70,400 man vel a ni thung.

VISA A NGAI HRAN LO

Russia sawrkar chuan fans tam takin World Cup an chhim theihna turin Visa policy an neihsa an ti danglam a, intihsiakna țan hma leh intihsiakna neihchhungin Visa nei kher lo va an ram luh theihna an siam a; amaherawhchu an ram hriatpuina FAN ID neih a ngai thung.

FAN ID hi neih theihna kawng thum a awm a, mahni awmna hmuna thleng thei turin emaw ticket lakna hmun emaw stadium-a lak theihin a awm ang.

Ticket lak veleh FAN ID hi a dil nghal theih ni mahse dilna siamin an pawmpui thlap a ngai.

HRIAT NGAI ȚHENKHATTE

Khawvawhna hmun ni mahse World Cup khelhlai hi chuan Russia-a khawlum hunlai emaw ni sat vanglai a ni dawn a, phone charge duh pawhin European ho hi chuan two-pin plug an hmang tlangpui a hetiang hi chu inrinlawk harsa lo a ni.

Russia pawisa Ruble khat hi India pawisa chuan Rs. 1.14 vel a ni bawk a, in chhut sa thlap lo chuan thlen chhoh ve ngawt a fuh lo maithei.

Thlawhna hmanga kal a ngaih dawn avangin flight ticket chungchang pawh hriat a pawimawh leh a, entirnan, let leh lam nena chhutin Bengaluru-Delhi-Moscow ni ta se a vaiin Rs 60,000 vel ticket manah sen a ngai ngei dawn a, let lehnghalna ticket lak tello chuan Rs 15,000 ațanga Rs 35,000 vel chawi a ngai thung.

Business class-ah erawh ticket man hi a sang deuh a, let lehnghalna tur nen lak nghal chuan Rs 3.5 lakh (nuaih) vel daih sen a ngai a, let lehna tur la tel lo chuan Rs 1.7 lakh vel chiah sen a ngai ang.

Hotel-a thlen a țul dawn avangin hotel rate pawh hriatsa a pawimawh ang. Russia ramah hian Five Star Hotel-a zan khat riah man hi $300-$350 vel niin India pawisa chuan Rs. 30,000 a ni lawih a, Four Star Hotel-ah erawh zan khat riah man hi India pawisa chuan Rs. 13,000 man vel a ni leh thung.

Russia rama an ei nasat leh lar deuh chu Solyanka a ni a, hei hi soup niin sangha emaw sa (meat) leh pa (mushroom) hmanga siam a ni a purun (oinion)-te leh thildang bawlhlo nen an chawhpawlh.

Russia ramchhunga khawi restaurant-ah pawh Solyanka hi chu a awm vek niin an sawi a plate khat hi India pawisa chuan Rs. 180 man vel a ni.

In chi duh tan pawh thlaphanna tur a awm hauh lo mai. Russian hoin an ngainat em em mai pakhat chu Kvass niin buh emaw chhang um ațanga siam niin alcohol (0.05-1.44%) a tel.

Russia larna pakhat chu Vodka hi a ni a, an rama Bar zawng zawngah khian Vodka neihloh lai an nei lo va St. Petersburg khawpuiah pheichuan Museum of Russian Vodka a awm.

Russia-ah hian hmun tlawh duh tan pawh tlawh tur a tam a, khualzin mite pawhin kumtin an tlawh ruih ruih reng a ni.