Kiev-a Olimpiyskiy Stadium-ah Real Madrid leh Liverpool te chuan 2017/18 Champions League final an khel a, Real Madrid chuan 3-1 a hnehna changin history an siam chhunzawm ta zel a, a zawnin vawi thum Champions League trophy an chawi ta. A zawna UCL trophy chawi thei awmchhun chu Real Madrid an ni a, a zawna vawi thum chawi thei hmasa ber leh awmchhun chu Real Madrid bawk an ni leh ta.

Real Madrid tan hian fans lamin an ngainat loh player pahnih Benzema leh Bale te chuan goal an khung a, Bale hian start lo mahse second half-ah Isco thlakin goal hnih a rawn khung a ni. LIverpool goalkeeper Karius vawi hnih mualpho takin a chesual a, Benzema leh Bale ten an chhawr tangkai a, Liverpool atangin Mane chuan goal khat a khung bawk.

Klopp hian final vawi 7 a khelh atangin vawi 1 chiah hnehna a la chang a, Liverpool ropui takin khelhpui mahse final-ah chhiatna lian tak a tawk ta a ni.  Salah inhliam Liverpool-in an tuar hle a, Karius-a chetsual vangin goal hnih an chhuah nghe nghe bawk. Zidane chuan Real Madrid a enkawl hnuah kum tin UCL trophy a chawi a,Real Madrid a enkawl hnuah final a luh apiangin hnehna a la chang ziah bawk. Real Madrid chu Europe-a champion ngun ber niin vawi 13 lai an champion ta a ni.

Real Madrid 3-1 Liverpool 

(Benzema 51', Bale 64', 83') (Mane 55')

PLAYER RATINGS

Real Madrid - Navas 5, Carvajal 5, Ramos 7, Varane 7, Marcelo 8, Casemiro 6, Kroos 8, Modric 7, Isco 5, Benzema 8, Ronaldo 7. Subs - Nacho 6, Bale 9, Asensio.

Liverpool - Karius 2, Alexander-Arnold 5, Lovren 6, Van Dijk 6, Robertson 6, Henderson 5, Wijnaldum 5, Milner 5, Salah 5, Firmino 6, Mane 9. Subs - Lallana 5, Can.

Zidane chuan nikum final-a a starting XI chiah chiah Liverpool hmachhawn turin a rawn thawhchhuahpui leh a. Tlar hma nei tha ve ve an nih avangin inkhelh tir lamah an tlarhnungte an buai teuh thin hle. Liverpool chuan game tempo rang takin an nawr nghal, Real Madrid erawh chuan tactical deuha khelh tumin inkhel bul an tan.

Ronaldo chuan Isco ball pek tha zet chu mual dinglam sirah Ronaldo chuan box chhungah khalhlutin a shot, a over chiah chiah. Hei bak inkhel tan tir lamah Real Madrid-in chance hlauhawm an nei lo, Liverpool chuan tempo rang tak nen an nawr char char a, chance hlauhawm pawh an nei nual. Arnold-a shot tha zet chu Navas chuan ropui takin a lo dang. Liverpool hmatawngte an viak a tha a, Real Madrid-in an nawr hleithei lo.

Ramos chuan Salah titluin; Salah hian a dar a sawh hliam palh hluah mai, a khel chhunzawm thei ta lova, mittui nen mual chhung a chhuahsan. Hmunawl zawng thiam leh defender pawt darhtu ber Salah hliam hnu atang hian Liverpool hmatawng an bil tan ta, Real Madrid an rawn langsar chho ta zel a. Hetih lai hian Carvajal pawh Arnold nen an inchuhna lamah a hliam hlauh bawk, ani pawh mittui nen mual chhung a chhuahsan.

First half tawp dawnah Benzema chuan goal khung mahse assistant referee-in offside a lo phar hlauh a, Isco ball cross Ronaldo tauh chu Karius chuan ropui takin a lo dang a, hemi per hi Benzema chuan pet goal-in pawm erawh a ni ta lo a ni. Hemi hnu chiah hian bench atanga lut Nacho pawhin Benzema cross tha zet chu box dinglam sir atangin a pet goal teuh hle a, Benzema pawhin box pawn atangin kawh takin goal a khung teuh hle bawk.

Second half tirah Isco chuan goal khungna chance tha tak a nei, Lallana ball khawih per chu hnai set sawt atangin a push kang, a goal ngei dawn nia a lan laiin goal bar a per hlauh. Hemi hnu 51 mins-ah goal danglam tak kan hmu. Karius a chesual tlat mai, a ball man chu a vawmchhuak nghal thawt thawt, hnai takah Benzema a lo awm si, Benzema chuan a ke a lo kham a, a goal ta a.

Liverpool-in si an phur rei lo, 55 mins-ah Sadio Mane hmangin an rul nghal. James Milner-a corner pet chu Van Dijk chuan tauhin; Mane chuan hnai set sawt atangin a pet goal. Real Madrid chuan hmahruai leh ngei an tum a, mual dinglam sir atanga Modric ball vawrh chu Isco chuan box chhungah lo dawngin a shot nghal, Liverpool goalkeeper Karius chuan a lo save.

Zidane chuan Isco lachhuakin Gareth Bale a dahlut, mual chhungah second 122 chiah a awm hman, Bale hian goal ropui a rawn khung nghal. Mual dinglam sir atanga Marcelo cross chu penalty spot vel atangin overhead kick mawi lutukin a pet, top corner-ah mawi takin a lut chhunzawm, Real Madrid chuan 2-1 in hma an hruai ta. 70 mins-ah Mane chuan Liverpool siphurh a rul teuh hle, box pawn atanga a shot tha zet chuan Real Madrid goal post a per.

Mane chance neih zawh chiah hian Real Madrid chuan counter attack hmangin chance hlauhawm tak an nei, Casemiro ball pek tha tak chu free takin Ronaldo chuan changin box chhung atangin a pet goal tawh mai dawn nia a lan laiin Robertson chuan a lo dang tha kher mai. 82 mins-ah Bale chuan mual dinglam sir atangin tha lutukin ball a vawrh, far post-a lo awm Benzema chuan a hlap, hei hi Liverpool goalkeeper Karius chuan tha takin a lo save.

Karius a chesual leh ta tlat mai le, 83 mins-ah Bale chuan box pawn atangin kawh zetin a shot, a zawna lo kal chu Karius chuan man a lo tum, a tisual ta, ball a tlang a, a goal ta. Real Madrid chuan 3-1 in hma an hruai ta reng mai. Bale hian a goal hnihna a khung hnu lawkah hian hattrick siam theihna chance tha tak a nei chhunzawm, chak takin ball a tlanpui a, box chhung a thlenpui hnu chuan shot a tum, Lovren chuan a lo dang hman hlauh.

Hun a tawp a, Real Madrid chuan 3-1 in hnehna an chang a, UEFA Super Cup-ah Madrid derby kan hmu dawn ta, Europa League champion Atletico Madrid leh Real Madrid te an inhmachhawn ang. Player pahnih inhliam Salah leh Carvajal te inhliam dan chiah hriat a la ni lo, World Cup an khel thei angem? Tih chu mipui te ngaihven mek a ni e.

Zanin game-ah goal a khung lo mahse Ronaldo chuan tun season Champions League-ah goal 15 lawih a lo thun tawh avangin tun season-ah UCL Top scorer bawk a ni leh ta. Season 7 Top scorer a ni ta. Ronaldo hian Champions League trophy vawi 5 chawi tawhin an khaikhin ber Messi erawh chuan vawi 4 a chawi tawh a ni.