Wimbledon hmeichhe semi final khelh zawh a ni ta a, Venus Williams chuan 6-4 6-2 in Britain Konta a hneh a, Muguruza pawhin 6-1 6-1 in Rybáriková a hneh bawk.

Wimbledon-a vawi 5 lo champion tawh kum 37 mi Venus Williams chuan straight set-in Britain Johanna Konta a hneh a, kum 26 mi Konta hi 1977 hnua Britain hmeichhia Wimbledon final lut leh hmasa ber tura beisei a nih laiin a tlawm ta a ni.

"Hun tha tak tlemte chu hmu mah ila ka khingpui kha a tha em a ni. Ka tihsual em em ka hre lem lo, ka khingpui khan fak a phu a ni," tiin Konta chuan a sawi.

"Hemi hmunah hian final ka lo khel ve nual ta, vawi khat ka khel leh tur hi a ropui ka ti khapw mai. Ka theihtawp ka chhuah dawn a ni.

"Mipuite ka chungah an tha em em a, Jo kha an tan zawk tih ka hria, mahse mipuite an fel khawp mai," tiin Williams chuan a sawi.

Kum 1994 hnuah Williams hi hmeichhe lama Grand Slam final thei upa ber a ni a, final-ah Spanish Garbine Muguruza a hmachhawn ang.

Mipa semi final hi Zirtawpnia khelh a ni dawn a, Querrey leh Cilic an inhmachhawn anga, Federer leh Berdych an inhmachhawn bawk ang.