November ni 12, 2016 khan Suaka Cricket Stadium-ah Chanmarians leh Kulikawn Cricket Club-te chuan Cricket Association of Mizoram buatsaih President's Cup final an khel a, harsa lo takin Chanmarians hian hnehna an chang a, 2016 President's Cup champions an ni ta a ni.

Coin toss a chak zawk Chanmarians ten batting line up thui tak an nei a ni tih hriain target um tu zawk nih an thlang a, Kulikawn lamin vaw hmasain an innghahna leh an Captain Michael Lalremkima chu Run 6 chiah a siam tihin a out tlat mai.

Semi final-a half century vaw chhuaktu Michael-a partner Lalrinsanga pawhin a thawh hlawk lo hle a, run 17 chiah a siam thei a ni. Middle order lamah Prasanjit Sarkar (20 runs) leh Parvez Ahmed (27 runs) ten Kulikawn lam dinhmun rawn chawi kang hret mahse Golu Vikash Kumar leh Lalbiaktluanga te an rawn duck out leh ta si a.

Kulikawn lam hian wicket 8 hlohin run 102 an siam a, Chanmarians bowler-ah Raj Kumar chuan Run 16 chauh pein wicket 3 a la a, Lalthanzuala pawin run 15 pein wicket 3 a la ve bawk a ni.

Batting line up thui tak nei Chanmarians ten an target umna kawngah opener Lalhruaizela chuan run 11 chauh siamin out vat mahse Lalhmangaiha a ding nghet tlat a, a tawp thlengin a dam a, run 64 a vaw chhuak a, boundary vawi 9 lai a vaw chhuak bawk a ni.

Lalhmangaiha a chet that rual hian a kiangah K. Lalremruata pawh nghet takin a ding a, ani hian run 16 lai a rawn vaw chuak ve a, Chanmarians hian harsatna engmah tawk lovin President's Cup Final-ah hian an target run 103 chu over 14.3 ah wicket khat chauh hlohin an um pha ta a, 2016 President's Cup Champions an ni ta a ni.