Abu Dhabi GP-ah Lewis Hamilton chu pakhatna ni mahse Nico Rosberg chu pahnihna a nih avangin World Champion a ni ta tho a, Championship-ah Nico hian 385 points a nei a, Hamilton chuan point 5-in Nico hi a phak ta lo a ni.

Rosberg hian a pa hnung a zui a, kum 1982 khan Nico-a pa Keke chu World Champion a lo ni tawh a, pa fa champion thei pahnihna niin, Graham leh a fapa Damon Hill te chu pafa champion thei hmasa ber an ni.

Hamilton chuan a theih tawpin a title hum him a tum a, intlansiak tawp lamah Mercedes hotute chuan Hamiton chu Rosberg inlehpelh tir mai turin an ti, mahse Hamilton chuan an hotute thu awih lovin chance awm thei zawng zawng a ngaihtuah a. Hmahruaitu niin a hnung amite a dang khawm, a tlan muang, mahse Vettel chuan a hnampui Rosberg tihbuai a tum lo niin a lang, intlansiak a zawh chuan Rosberg chu pahnihna a ni ta tho a, Vettel pathumna a ni ta a ni.

"Intlansiak nuam ka tih loh ber pawl a ni chiang mai. Khang lap-te kha a hlimawm hauh lo, mahse a zo tawh, ka lawm hle a ni," tiin Rosberg chuan intlansiak zawhah a sawi. Kum 23 chhungin German driver te chuan title vawi 12 an la ta a ni. "F1 hmuhnawmna chu hei hi a ni a, team khata driver pahnihte pawh an inel em em, an karah inhmuhthiam lohna pawh a awm thin, a tu zawk zawk pawhin chak an duh a, chu chu ani kan duhthusam chu," tiin Mercedes technical boss Paddy Lowe chuan a sawi.

He intlansiakah hian thil danglam em em a awm lova, 2009 World champion Jenson Button chuan kum 36 mi niin intlansiak a chawlhsan ta a. A intlansiak hnuhnung berah erawh an duhthusamin thil a thleng lo, lap 12 lek a tlan tihin khawl lam harsatna avangin a tlan chhuak ve thei ta lo a ni. Tin, kum 35 mi Brazilian driver Felipe Massa pawhin intlansiak a chawlhsan ta bawk a, a intlansiak hnuhnung berah hian 9-na a ni.

Red Bull driver Max Verstappen chu an tlanchhuak chiah kawi khatnaah a vir palh, tha takin a tlan chho leh a, mahse tyre lamah harsatna a tawk hlauh mai, Verstappen tlan hmuhnawm tak a tawp lamah kan hmu ta lo. Sebastian Vettel chu lap tawp lamah a rawn tlan tha em em e, Verstappen tlanpelin pathumna a ni a, podium-ah a hmel kan hmu leh ta a ni. Hamilton chuan point 5 chiahin a team-mate Nico Rosberg hi a phak lova, a career-ah pakhatna vawi 53 a ni ta a ni.