Novak Djokovic chuan Alexander Zverev a hneh a, Shanghai Masters final thlengin, ranking thar a chhuah hunah World No. 2 a ni thei ang.

Shanghai Masters khelh mekah Novak Djokovic leh Alexander Zverev te chu semi final-ah an inkhel a. Djokovic hi harsa lo takin 6-2, 6-1 in a chak a, final a lut a, a zawnin match 17 chhung chu a chak ta bawk a ni.

Serbian Novak Djokovic hian final-ah Roger Federer leh Borna Coric te inkhela chak zawk zawk a hmachhawn dawn a. Djokovic hi a che tha chho bawk a, karleh khian ranking thar a chhuak dawn a, chutah chuan World No. 2 a ni leh thei ang.

Final-ah Djokovic hi champion thei ta lo mahse No. 2 chu a ni thei dawn tho a, Roger Federer aiin a sang dawn tho tho a. Tun ang renga a chet that chhoh theih zel chuan No. 1 dinhmun pawh a luah theih vat dawn a ni.

Djokovic hian 2017 khan Internazionali d’Italia final-ah Alexander Zverev hi a lo hmachhawn tawh a, hemi tum hian a chak lo zawkah a tang a. Tun tumah erawh harsatna awm miah loin a chak chiang hle a, Shanghai-a vawi thum lo champion tawh Djokovic chuan harsa lo takin final hi a luh theih phah a ni.