Zokhawthar Zone Football Championship 2023 final khel turah buaina a awm, final-a inpet kai Zokhawtharin registration lamah dan an bawhchhia nia Zone FA in a hriat avangin, Semifinal-a an hneh tak Hruaikawn nen rematch nei turin an chung thu rel a ni a, Zokhawthar hi an inhnuhdawh tak avangin an aiah Hruaikawn chuan final an khel ta a ni.

Final-ah hian Melbuk leh Hruaikawn an inhmachhawn ta a,Hruaikawn hian inkhel pumpuiah an ngam lo tluan a, Melbuk hian si 5 faiin hnehna an chang a, Melbuk tan Lallawmtluanga'n goal 3 khungin hatrrick a siam a, Lalsawmzela leh Benjamin-a te'n goal 1 ve ve an khung bawk.

Veteran final-ah Melbuk leh he tournament-a tel tura sawm Khuangleng te an inkhel a, Melbuk hian min 23-naah Justin K Doa hmangin goal an khung hmasa a, he goal hi an champion-pui mai dawn emaw tih laiin hun tawp hma minute 7 a la awmah Khuanglengin penalty an hlawhchhuak.

Masanga'n penalty chu goal-ah chantirin an siphurh an sut a, hun pangngaiah goal dang a luh belh loh hnuin hun bek belh khelh a ni a. Team pahnihte'n goal khung belh lo ve vein Penalty Shootout hmanga chak zawk zawn niin, Melbuk chuan 4-2 a vanneihna changin an champion ta a ni.

Champion - Melbuk
Lawmman - Rs 50,000 + Trophy+Medal

Pahnihna - Hruaikawn
Lawmman - Rs. 20,000 + Trophy + Medal

Best Player - Ramnunmawia, Melbuk
Top scorer - Lallawmtluanga, Melbuk (Goal 8)

Fair Play - Melbuk

VETERAN
Champion - Melbuk
Lawmman - Rs. 13, 000 + Trophy 

Pahnihna - Khuangleng
Lawmman - Rs. 7,000 + Trophy

Reporter : Jacob Khawlhring