Zlatan Ibrahimovic chu tun season chhunga che tha lo tak Manchester United dinhmun tha lo tak atanga chawi sang theitu tur a nih thu Clayton Blackmore chuan a sawi.

Swedish striker Zlatan Ibrahimovic chuan Old Trafford-ah season khat hun a hmang a. 2016-17 chhung khan Jose Mourinho kaihhruaina hnuaiah Manchester United tan a khel a ni.

Ibrahimovic hian inelna hrang hrangah goal 28 chu a thun hman a, a inhliam avangin season a hmang tluan thei ta lo a, a duh angin boruak pawh a siam nasa ta lo a. March 2018 ah khan Manchester United chhuahsanin Major League Soccer lam a pan a, kum 38 mi ni tawh mah se thawm a la nei lian hle a ni.

Manchester United defender hlui Clayton Blackmore chuan Ibrahimovic chu Premier League velah pawh boruak la nei lian thei viau tura a ngaih thu sawiin, tun hnaia goal thun harsat em em Red Devils tan chuan chhawr tlak tak a la nih a rin thu a sawi.

Blackmore chuan, “Tunah tak hi chuan Manchester United hian target man an mamawh hle a, chutiang tur chu Zlatan Ibrahimovic hi a ni a, ani tluka tha tur hi an awm lo,” a ti.

“Zlatan hi feet 6 leh inches 5 zeta sang a ni a, black belt a ni bawk a. A kum hi tam chho ve tawh mah se tun thlengin goal a la thun thei em em a, a that lohna a la awm reng reng lo,” a ti bawk.

A sawi zelnaah, “Striker tha tak tak kan lo chhuah nual tawh a, Robin van Persie te, Wayne Rooney te kan chhuah a, an aiawh thei tur player tha tak kan la lut leh si lo a, hei hian harsatna a thlen ta a ni ber,” a ti.

“Ibrahimovic hi a tlan ve vak vak lo a, a thiam em avangin a tan tlan chiam chiam a ngai ve kher lo a. Kum thar January thlaa transfer window a inhawn leh hunah Zlatan hi lak luh ngei tum se a fuh khawpin ka ring,” a ti bawk.

“Robert Lewandowski lak luh an rilruk a, hei pawh hi duhthusam chu a ni ve chiang bawk a. Ani pawh hi tlem chuan a upa ve tan tawh a, chutih rual chuan club-in a mamawh tak player chu a ni a. Tlema player naupang deuh zawkte pawh a pui thei zel dawn a ni,” tiin Blackmore chuan a sawi.