Khawvela striker lar ber zinga mi Zlatan Ibrahimovic chuan kum hnih dawn a khelhna LA Galaxy a chhuahsan fela, kum 38 lai ni tawh mahse Swedish striker hi chawlh mai a la tum lo niin a lang.

Zlatan hi thla leh December thla hian LA Galaxy-a a contract neih lai a tawp dawn a, mahse tun kar khan a club nen inremna neiin tunah a chhuahsan fel ta zawka, social media lamah LA Galaxy a chhuahsan thu hi kum 38 hi a dah chhuaka, a thawnthu chu a la awm chhunzawm zel tur tih a sawi tel avangin inkhelh a la chawlhsan mai dawn lo niin a lang.

Zlatan hian nikum March thla khan Manchester United chhuahsanin Major League Soccer lamah hian a insawna, kum hnih dawn LA Galaxy tana a khelh chhungin game 53 ah inkhel bul a tan hmana, goal 52 lai a khunga, a game hnuhnung berah Los Angeles FC chu MLS Cup playoffs conference semi-final ah LA Galaxy hian an hneh lo.

LA Galaxy-ah a goal khung theihna chhawm zui zel mahse Zlatan hian playoff game pakhat chiah a khel hmana, kumin khan MLS MVP lawmman chu LAFC striker Carlos Vela chuan a dawn khalh bawk a ni.

Zlatan hi khawvela striker tha ber zinga mi a ni thin a, tun thlengin khawvela footballer lar ber zinga mi a ni a, Europe-a club lian ber ber; Ajax, Juventus, Inter Milan, Barcelona, AC Milan, Paris Saint-Germain leh Manchester United tan te a khelh hnuah MLS club lar bera chhal ngam LA Galaxy lam a pan leh ta a ni.

Zlatan hi tunah hian free agent a ni meka, kum 40 tling ve dawn tawh mahse striker tha la niin, a club zawm tur ber hi sawi chian theih la nilo mahse Europe lamah a kir ngei dawn niin a langa, a club hlui AC Milan nen sawizawm ni nasa hle in, AC Milan bakah Italian club dang Bologna nen pawh sawizawm a ni mek a ni.