Zlatan Ibrahimovic chawimawina atan an khua Malmo-ah a lim lian zet mai an siam a, chu lim chu Thawhlehni khan an tlangzarh.

“Khawi atanga chawr chhuak pawh ni ila, khawi hmuna awm pawh ni ila, kan hmel chu eng ang pawh ni se, he lim hian engkim hi a tih theih vek a ni tih a lantir chiang hle,” tiin Ibrahimovic chuan a sawi.

Ibrahimovic hi a hma deuhin a lim an lo siamsak tawh bawk a, Paris khawpuia Grevin wax museum-ah a lim chu an lo dah tawh bawk a ni.

Swedish legend Zlatan Ibrahimovic hian a lim hi kum nga chhung zet a lo nghak tawh a. He lim hi Swedish sculptor Peter Linde siam niin, lim san zawng hi 2.7 metre zet mai a ni a, kg 500 zeta rit a ni bawk a. Ibrahimovic chu sang ve thawkhat tak, 1.95 metre (feet 6 leh inches 5) zet ni mah se a lim chu a tiat lo hle.

LA Galaxy striker Ibrahimovic-a chhungte chu Yugoslavia atangin Sweden-ah hian an pem lut a, Malmo khaw bul lawk Rosengard-ah harsa ve takin an khawsa tan a. Buaina leh harsatna neuh neuh karah an awm chho ve zel a, tun dinhmun hi an thleng chho ve thei a ni.

Zlatan chuan Malmo atangin bul a tan a, hemi hnuah hian Ajax Amsterdam, Juventus, Inter Milan, Barcelona, AC Milan, Paris Saint-Germain leh Manchester United ah te a khel kual a, chumi hnuah Major League Soccer lamah kalin LA Galaxy chu a zawm leh ta a ni.

League title a la hnem ve hman hle a, Netherlands, Italy, Spain leh France vela a kal kual chhung hian season 16 chhungin title 13 zet chu a la hman a. Heng zinga pakhat, Juventus a lakpui erawh chu an hnuk kir leh thung a. LA Galaxy chu MLS playoff a thlenpui a, October 20 hian first round-ah Minnesota an hmachhawn ang.

Swedish national team taan 2001 atang khan a khel tan a, 2016 thlengin a khel a. Ram tan hian vawi 116 zet chu a khel hman a, hengah hian goal 62 chu a thun tling hman a ni.