Chelsea manager Frank Lampard chuan season thara an player ni mai tawh tura ngaih Hakim Ziyech chu an tumpuite defence thiah kawngah a tangkai hle dawna a hriat thu a sawi.

Kum 26 mi Moroccan player Ziyech-a chungchangah Chelsea leh Ajax te chuan tunkar khan inremna an neia, a man hi pound maktaduai 33.3 niin, season thar atangin Ziyech hi Chelsea player ni ngei tura ngaih a ni.

Ziyech hi Dutch league lamah a che tha thin hle a, assist a neih theih mai bakah goal pawh a khung thei thawkhat viaua, chance siam chhuah lamah ani aia thawhhlawk hi Europe-a league lian pangaah an awm tamin a rinawm loh bawk.

Tun season-ah Chelsea hian goal khung harsat chang an nei fo a, an player-te zingah an tumpuite defence thiat thei an awm mang loh avangin Ziyech hi Chelsea player mamawh tak niin a langa, an lak luh fuh viau pawh a rinawm.

Lampard chuan Ziyech-a chungchang sawiin, “Player tha tak a niin ka hria a, nikum Champions League-a Ajax tana a khelh atang khan ka mit a la tan tawh. Khami tum khan ani hi a langsar ber zinga mi niin ka hria a, Tottenham nena an inkhelh tum phei kha chuan a langsar hle.

“Tun season-ah Ajax hi vawi hnih hmachhawn tawha, chuvang chuan Ziyech pawh hi ka hre hneh ve tawh hle a, a that zia pawh ka hria. A ke veilam hi a tha em em a, dinglamah khel ber mahse striker hnung chiahah pawh a khel thei.

“Tun season-a kan khel in en chuan defence kan thiah theih loh chang a awm tih in hria anga, Ziyech hi kan tan hemi kawngah hian a tangkai dawn hle in ka hria. Goal a khung theia, assist a nei thei em em bawka, tunah lo lut rih lo mahse season thara a lut tur hi club tan leh kan supporter-te tan a phurawm hle in ka hria a ni,” a ti.