10 Sep 2018 02:29

inkhel

Zidane, Tyson leh McEnroe te huangah Serena

US Open 2018 hmeichhe singles final-ah Naomi Osaka chuan Serena Williams hnehin a vawi khatna atan Grand Slam title a la a. Tun tumah hian a champion chanchin aiin final-a chak lo zawk Serena Williams hian thawm a nei lian daih zawk a, chair umpire Carlos Ramos a tih dan chuan sawi zui a hlawh hle a. Serena hi Zinedine Zidane, Mike Tyson leh John McEnroe te huangah an dah ve phah a ni.

Vawi 23 ngawt mai Grand Slam title lo la tawh Serena hian Inrinnia an inkhelh laia chair umpire Carlos Ramos chu ‘dawheh’ a tih bakah ‘rukru’ tiin a sawi tel bawk a, hei lo pawh hi dan bawhchhiat a nei teuh bawk a. Khawvel hmun hrang hrang atanga hmeichhe singles final thlirtute mak tih a hlawh hle.

Serena Williams hi Naomi Osaka nen an inkhelh laiin a thinrim a, penalty a chawi phah hial a, amah ngaisang em emtu Japanese tleirawl Osaka chu 6-2, 6-4 in a chak ta nghe nghe a, Grand Slam title a lak hmasak ber a ni.

An inkhelh zawhah Flushing Meadows-a entu mipuite chuan Serena chet dan chu an dem tih lantir nan an au el hluah hluah mai a. Mi thenkhat chuan Carlos Ramos chu an dem laiin, thenkhat chuan dan kenkawh a duh avanga set khatnaa Serena kha warning pe a nih thu an sawi ve thung a ni.

Umpire Ramos hian Serena chu court sir atangin a inkhelh laiin inkhelh dan tur an rawn hrilh niin a puh a, hei vang hian Serena chu a thinrim ta a. Williams hian Ramos hi dawt sawi nia puhin a hnial ta ngar ngar a, set hnihnaah phei chuan tawngkaa a beihna avang hian Osaka chu game khatin a chungnun belh tir a, 5-3 in hma a hruai theih phah bakah, title a la zui ta nghe nghe a ni.

An inkhelh zawh hian Williams hi a tap a, mipui lo au pawh chu au tawh lo turin a ngen a. Inkhelh zawha kawm an tum pawhin a lo hnar zui a, Osaka chu a lawmpui thu sawiin, kumin US Open tawh dan duhawm lo tak mai chu pawi a tih thu a sawi.

Infiamna khawvela ngaihsan hlawh berte zinga mi, khawvel hmun hrang hrang atanga mi maktaduai telin an thlir laia hetiang thil a thleng hi mi tam tak chuan zia lo an tih thu an sawi hlawm a. Mahse, tun tum hi hetiang boruak ang chi a awm hmasak ber a ni bik lo. 1981 khan Wimbledon first round-ah John McEnroe chuan umpire Edward James thutlukna chu a hnial a, an inhnial hnuah kum 22-a upa McEnroe chu a chak zui ta tho a, hemi tum hian a vawi khatna atan Wimbledon title a la a, kum 4 chhungin All England Club title vawi 3 a la zui a ni.

England captain Mike Gatting chuan 1987 a Pakistan leh England in Test an khelh tumin umpire Shakoor Rana chu a hnial hrep tawh a. Mike Gatting leh Shakoor Rana te inkar boruak hi a sang hman hle a, a tukah Rana hian ziaka ngaihdam dilna a phut a, a phut anga Gatting hian ngaihdam a dil hnuah inkhel pawh an chhunzawm leh chauh a ni.

Mike Tyson pawhin 1997 khan boruak a nei lian hle a. November 1996 ah WBA heavyweight title chu Evander Holyfield lakah a hloh a, thla sarih hnuah an inhnek leh ta chiah a. Third round-ah Tyson hian Holyfield-a beng a seh thla a, hei vang hian inhnek an titawp a, Tyson chu chak lo zawka an puan mai bakah $3 million an chawitir a, kum khat chhung a boxing licence an ti thi bawk a ni.

2006 FIFA World Cup final-ah Zinedine Zidane chuan Marco Materazzi a si tlu tawp tawh bawk a. France leh Italy te chuan hun pek belh an khel a, first half-ah Italy defender Materazzi hian Zidane hnenah eng emaw a sawi a, hei hi Zidane hian a ngaithei lo hle a, Materazzi chu a awmah a tauh a, Italian player hi a tlu tawp a. Referee Horacio Elizondo chuan Zidane hi red card pein a hnawt chhuak nghal a, France chu penalty shootout-ah an chak lo zui a ni.

Super League Grand Final, 2014 khan Wigan Warriors player Ben Flower chuan an inkhelh tir lamah St. Helens player Lance Hohaia chu a hmaiah a hnek a, Hohaia hi nikhaw hre loin a tlu a, heti chung hian Ben Flower chuan a khawih zui leh a. Referee Phil Bentham chuan Flower chu a hnawtchhuak nghal a, thla ruk chhung inkhel thei lo turin an hrem zui a ni.