13 Aug 2019 06:09

inkhel

Zidane khan tha bik riaua inngaihna min neihtir: Cristiano

Cristiano Ronaldo chuan Zinedine Zidane a fak hle a, Real Madrid-a a khelh lai khan player dangte aia chungnung bik riaua inngaihna a neihtir nasa hle niin a sawi.

2018-19 season tan hmain Cristiano Ronaldo chuan Santiago Bernabeu chhuahsanin Italy ram lam a pan a, €112 million zetin Serie A champion Juventus a zawm ta daih a ni.

Vawi nga ngawt Ballon d’Or lo dawng tawh Cristiano Ronaldo chuan Zidane kaihhruaina hnuaiah hlawhtlinna hmel duhawm tak a hmu hman nual a. Real Madrid chu a zawnin vawi thum chu Champions League title a lakpui bakah 2016-17 season-ah La Liga title a lakpui bawk a ni.

Portuguese superstar Ronaldo chuan Real Madrid manager Zinedine Zidane chu a fak hle a, an pahnih inkar boruak that thin thu te a sawi chhuak a ni.

“Player te tan chuan mahni inrintawkna neih that a pawimawh em em a, hetianga mahni inrintawkna nei tha tur hian mahni chauha hma lak chu a dik famkim lo a. Player dangte leh coach te hi an pawimawh hle a, an inthlawp tawn hle a ngai thin,” tiin Cristiano chuan a sawi.

“Team zingah pawimawhna kan nei ngei a ni tih min hriattir ve thin a tul hle a, chutiang deuh chuan Zidane pawh khan player pawimawh tak ka nih zia kha a tilang fo thin,” a ti bawk.

A sawi zelnaah, “Zidane khan kawng tam takah min pui thin a. A hma pawhin ka zah em em thin a, kan thawh dun hnuah khan amah ka hre chiang lehzual a, khami hnuah phei kha chuan ka ngainatna hi a zual tial tial a ni ber mai,” a ti.

“A mihring mihrinna, a mizia hriat chian chuan ngainat loh theih a ni lo a. A tawng dan te, team a kaihhruai dan te, min enkawl dan te zawng zawngah khan fakna tur hlir a ni ber a. Thudik a ngaina a, engkim kha tlang takin a sawi mai zel a, khatiang avang tak khan engtik lai pawhin ka ngaina reng tawh ang,” tiin a sawi.