Real Madrid president Florentino Perez chuan head coach Zinedine Zidane chu van atanga malsawmna a nih thu a sawi.

Pathianniah khan Real Madrid chuan Supercopa de Espana ah Atletico Madrid chu an hneh a. Zinedine Zidane kaihhruaina hnuaiah Real Madrid chuan trophy 9 an la tling ta chiah a, final a luhpui tawhnaah chuan a la chakpui vek a ni.

A vawi hnihna atan Real Madrid a enkawl leh hnuah Zidane hian trophy a lak leh hmasak ber niin, Florentino Perez chuan French coach kaihhruaina hnuaiah trophy dang pawh an lak zui zel a beisei thu a sawi a ni.

Florentino Perez chuan, “Zidane hian trophy min lakpui ve ta nual mai a, a lawmawm kan ti hle a, amah pawh hi kan lawmpui hle bawk a. Tuna mi hi duhtawk mai loin trophy dang pawh a lak belh zel kan beisei,” a ti.

“Real Madrid leh Zidane hi a inkungkaih nghet hle a, amah pawh hian kan club hi a hmangaih tak tak niin a lang a. Kum khat chhung chawlh hahdam kha a thlang a, tunah chuan tha tharin bul a rawn tan leh tawh a, kan tan chuan Zidane hi van atanga malsawmna a ni,” a ti bawk.

Jeddah khuaa King Abdullah Sports City Stadium-ah an player pawimawh thenkhat, Eden Hazard, Karim Benzema leh Gareth Bale te tel lo chung pawha an chak thei chu Florentino Perez chuan lawmawm a tih thu a sawi a. Heti chung pawha Zidane-a’n a squad neihte a hmang tangkai thiam viau mai chu ropui a tih thu a sawi chhuak.

“Kan player chhuanvawr thenkhat, Hazard, Benzema leh Bale te kan hruai tel lo a, chuti chung chuan Zidane khan player awm ang ang kha tha takin a rem khawm a, result duhawm tak a neihpui thei tho a, trophy kan la thei hial a ni,” a ti.

“Zinkawng dik kan zawh chho mek niin ka hria a, tlemin kan han tlahniam deuh lawk a, tunah chuan ngai kan awh chho leh tan a ni,” tiin a sawi bawk.