15 Mar 2019 07:59

inkhel

Zidane-a’n Mbappe thawhpui a chak

Zinedine Zidane chuan Real Madrid a enkawl hnuah Kylian Mbappe chu thawhpui a chak thu a sawi chhuak.

Real Madrid in Zinedine Zidane an koh kir hnuah thuthang neuh neuh a tam nghal hle a. Zidane hi Paris Saint-Germain nen an sawi zawm nasa hle a, a tirah chuan Brazilian forward Neymar chu a thlithlai nasa niin an sawi a, tunah chuan France forward Kylian Mbappe lak a tum niin an sawi leh tawh a ni.

Madrid chuan a hma daih atang tawhin Kylian Mbappe hi an lo hmutai tawh a, tunah phei chuan kum 20-a upa Mbappe hi World Cup champion a nih tawh bakah khawvela player tha ber pawl tia sawi theih a ni tawh a. Hetiang a nih takah chuan Real Madrid chuan PSG forward hi lei an duh ta hle a, Galactico thar atan an hual mek a ni.

Zawhna chhangin Zidane chuan, “Neymar nge Mbappe? Ka player ni lo chungchang chu engmah sawi ka tum lo a. Mbappe hi kaihhruai ka chak khawp mai a, amah anga player tha dang pawh ka kaihruai chak bawk a. Mahse, tunah chuan chutiang lampang sawi chi a la ni lo,” a ti.

Manager thar an neih hnuah Real Madrid chuan an player te siksawi nual an tum niin an sawi a, an player neih sa thenkhat chu chhuahtir an rilruk a, player thar lak belh an duh bawk a. An neih sa zingah Gareth Bale chu chhuak hnai bera sawi a ni mek a, Santiago Bernabeu-ah Bale hi a dinhmun a nghet tawh lo hle niin an sawi.

Tottenham Hotspur forward hlui Bale hi Premier League lama kir leh thei tur angin an sawi ri a, mahse Zidane chuan kum 29-a upa Wales forward chungchangah hian engmah a sawi duh lo a ni.

Tun season chhungin Bale hian beisei a pha lo hle a, mi tam tak chuan an sawisel nasa tawh hle a. Real Madrid tantu tam takte chuan Bale hi chhuak tura an duh thu sawiin, inkhelh lai pawhin an au el fo tawh a ni.

Bale chungchangah Zidane chuan, “Tun season chhunga Bale-a dinhmun chungchang hi sawi ka tum hran lo a. Game khelh tur 11 a la awm a, hengah hian chhawr zel ka tum a. Gareth hi inkhel turin a inpeih a, khelmuala chettlattir hi ka tum bawk a ni,” a ti.