Zidane-a’n Chelsea a enkawl duh lo

22nd February 2019, 02:02AM

Chelsea in Maurizio Sarri an ban a nih a, a hmun ruak luah tura an beisei Zinedine Zidane chuan Chelsea enkawl chu a rilruah a awm lo niin a sawi.

Maurizio Sarri hnuaiah Chelsea chuan beisei an pha lo chho mek a, hetiang boruak karah hian Sarri dinhmun pawh a derthawng hle niin an sawi a. Chelsea enkawl thei tur hian Zinedine Zidane hming chu an sawi ri a; mahse, Zidane hian Chelsea enkawl chu a tum loh thu a sawi a ni.

Italian coach kaihhruai Chelsea hian tun hnaiah chak hmel an hmu thei meuh lo a, hei vang hian Chelsea thuneitute chu an lawm tawh lo hle a. Napoli boss hlui hi Chelsea chuan ban an tum hnai tan niin thu a thang tawh a, game thum chhung chu an la enthla leh hram dawn niin an sawi a ni.

Club thuneitute hian Sarri an ban a nih tak pawhin Zinedine Zidane chu an club enkawltu atan an duh ber thu an sawi a. Mahse, hetianga thawm a rik chhoh tan mek lai hian French pa hian Stamford Bridge lama kal chu a tum lo tih a sawi chiang nghal a ni.

Sarri hian season tir lamah boruak a nei tha chho viau a, mahse hun a kal chho a, an zuih tial tial a. Bournemouth chu 4-0 ngawtin an hneh lo a, hei vang hian Sarri sawiselna a ri chhuak tan a. Hemi hnuah hian Etihad Stadium-ah Manchester City chuan 6-0 ngawtin an lo sawp ve leh a, chutah Manchester United lakah 0-2 in an tlawm zui leh bawk a. Hetianga an tlawm chhoh tak fo avang hian Sarri chu chhuak turin an duh phah ta hle a ni.

Season chawhnu lam an hmang mek a, hetiang hunah hian Sarri dinhmun chu derthawng viau mahse, manager thar tan duh anga chet lak vak theih a ni tawh dawn lo a. Zinedine Zidane pawh hian season tawp hnaih tawh lama club han enkawl thar leh chu a duh lem lo niin a ngaih theih ber a ni.

Zinedine Zidane hian a vanglaiin Premier League boruak a tem chhin lo a, chu bakah sap tawng a thiam nal lo hle a, hetiang vang te pawh hian Premier League lam pan chu a duh loh phah niin thenkhat chuan an sawi a ni.

Tuna thu thang awm mek tireh thei tur chuan Maurizio Sarri hian khelh tur hmabak an neih pahnihah a naute chu a chakpui a ngai dawn a. Chelsea tantute chuan tuna an dinhmun fuh thei lo tak chu kalsan an duh ve hle tawh a ni.

Copyright © inkhel.com 2024. All rights reserved.