20 Mar 2019 01:36

digimalt

​Zidane-a'n Benzema a khelhtir zelna chhan enge?

Real Madrid-in a zawnin (2015–16, 2016–17, 2017–18) Champions League no mawi vawi 3 zet an chawi a nih kha. Zidane-a hnuaiah goal khung hleithei lo French striker Benzema khan hmun a chang reng, engatinge Zidane khan Benzema kha a hnawl loh?

Striker te chu goal khung tura ngaih an ni a, fans leh coach-te pawhin goal khung turin an phut em em bawk thin. Striker ni ve si; goal khung hleithei lo chu coach dang chu nise an chhuahtirna a rei tawh ngei ang le.

Tin, heti hi a ni a; Real Madrid coach Zidane chuan Benzema-a tangkai zia a hmuh hmaih miah lo mai. Goal a khung hleithei lo, chutih laiin team pumpui tan Benzema pawimawhna Real Madrid-in a hre chiang.

Mual dinglam leh veilamah hmun thawl a nei thiam a, thiante goal khung tur pawh a siam sak thiam em em bakah goal a luh theih nan defender te a lo pawt darh thiam bawk. Goal an khung theih nan attacking lamah tha a thawh hlawk hle kan ti thei awm e.

Mihring kan ni a, theih tawpin kawng dik zawh tum thin mah ila harsa kan ti thin. Kan tum miah loh pawhin sualah kan lo tlu leh nge nge thin. Bawhchhiat tam tak nei thin mah ila Pathian chuan a hmangaihnain min dawm reng a, kan tihsualte hmuh kanin kan lo tih thatve te chu min hriat sak reng ta zawk thin a. Hei hi a ni zahngaihna, khawngaihna leh hmangaihna chu.

Mihring erawh chutiang kan ni lo, miin thil tha tam tak ti mahse a tihsual pakhat chu chiang takin kan hriatreng sak ta zawk thin a. An veng nula/tlangval kha a talent neih that avangin Mizoram hriatah a rawn lar hat mai, mi tam takin an fak mek. Chutih laiin, "Hmelthain zaithiam/lamthiam viau mahse a ler ve a, nupui/pasal pawh a nei ve zuai tawh alawm," te kan han ti kher zel a.

Mi chanchin thalo i sawi hian miin an ngaihsan phah lo che, i hlawh a pun phah lo, nula/tlangval lakah i luck phah chuang bawk lo. Tin, PUBG-ah i rank a san phah lo, i chicken dinner phah chuang bawk hek lo. I Club tan an champion phah chuang bawk hek lo bawk. An chanchin tha kan sawi peih lo a nih pawhin an chanchin chhia sawi kher ai chuan ngawih mai hi a finthlak zawk a ni.

Tin, Ronaldo leh Messi te hian in venga inkhel thiam tak in lo tih ve Liana kha an rawn sawi an rawn sawi peih lo, khawvel hriatah a lar ve lo tlat alawm, bakah anni pahnih aia thiam lo zawk a ni tih a chiang a, sawi enah pawh an en dawn lo hrim hrim. Mi kan sawiselte hi keini aia sang leh kan tluk lohte an lo ni tlangpui thin tih hi hria ila. I sawisel i sawisel chuan i lo ngaisang ru hle tihna a ni zawk thin.