Real Madrid a zawna vawithum ngawt Champions League nomawi chawipuitu Zinedine Zidane chuan tun nipuia Real Madrid a chhuahsan hnuah club enkawl a la nei leh lova, a thawm pawh a reh chho hle.

Zidane-a fapa upa ber Enzo Zidane chuan a pa chu football khawvelah a kir leh thuai a rin thu a sawi. Kum 46 mi Zidane hian management lam la luhchilh rei lo hle mahse, tunlai manager awm zingah mai ni lovin manager awm tawh zawng zawng zinga ropui ber pakhat a ni reng tawh dawn.

Zidane-a fapa Enzo chuan, “Ka pa hian football a hmangaih zia kan hre vek a, chuvang chuan a lo kir tep tawhin a rinawm. Tunah chuan a hahchawl meka, Real Madrid enkawl chu nuamin ropui hle mahse a hahthlak a, chuvang chuan hahchawlh a mamawh hle,” a ti.

Zidane hi Manchester United leh Juventus-te sawi zawm ni thin mahse thu chiang engmah a awm thei lova, a club enkawl leh tur hi rin thiam pawh a har hle. Zidane hian Real Madrid Castilla atangin a coaching career a tan a, kum 2014 khan Real Madrid B team hi a enkawl. Kum 2016-a Real-in an manager Rafael Benitez an ban hnuah Zidane hi first team lamah lak chhoh niin, a hlawhtlin pui zia chu sawi tam a ngai lo.

Champions League chu a zawna lak theih loh tluka ngaih thin a ni a, mahse Zidane-a hnuaiah erawh Real Madrid chuan a zawnin vawithum ngawt an la. Champions League title bakah hian Zidane hian Real chu La Liga title leh Copa del Rey title-te pawh a chawipui a ni.