Mohamed Salah chuan tun hnaia an rama ui leh zawhte khawlaia tla mai mai te ram pawna thawn chhuah tumna awm mek chu a sawisel nasa hle.

Liverpool star Salah chuan Egypt ram chhunga khawlaia zawhte leh ui tla darh mai maite thawn chhuah tumna chu a duh lo hle a, Twitter lamah hemi chungchang a duh lohna hi a tarlang a. A thu mai hi duhtawk loin a zawhte khawi lai Siamese cats te thla a lakpui chu a dah tel bawk a, “Zawhte leh ui te hi khawiah mah thawn chhuah a tul lo a. Hetiang thil hi a thleng lo ang a, thleng thei a ni lo,” a ti a ni.

Salah hian a thil post tawpnaah hashtag ‘no to animal rights violations’ tih a dah tel bawk.

Egypt rama agricultural ministry chuan kar hmasa khan an rama khawlaia zawhte leh ui tla vel chu man khawm a, an ram atanga thawn chhuah chungchang hi an ngaihtuah a, thawn chhuah ngei ni se tiin thutlukna an siam a. An chhut dan chuan hetianga khawlaia zawhte leh ui tla mai mai hi 4,000 chuang vel an awm a, heng ui leh zawhte rual hi hri dannaa enkawl an nih tawh thu an sawi a. Hetih lai hian tu te emaw chuan ei atan an that thin tih sawiin, hetiang thil hi a thlen chhunzawm zel loh nan ram pawna thawn chhuah chu a tha bera an hriat thu an sawi.

Salah hi Egypt ramah chuan a hmingtha hle a, ram mipuiin an ngaisang hle a, hei vang hian a thawm neih hian awmze thui tak nei ve thei a ni a. Kum thar March thlaa an ram president tur thlannaa ding tura duhtu pawh a ngah hle a, mipui maktaduai chuang zet chuan Salah hi president atan an duh thu an sawi hial a. Tuna sorkar rorelna dodal zawnga a tawng chhuak pawh hian thlawp a hlawh hle.

Mi tam takin Salah hi an thlawp viau laiin thenkhat erawh chuan ramsa humhalh a nih hma hian mihring chu dah hmasak zawk tur a nih thu an lo sawi ve mek bawk a, hemi chungchangah hian inhnialna lian tak an nei chho mek a ni.