Zarzoliana chuan middleweight title humhim turin 'Title Fight' a khel thei dawn lo tih a tichiang a, Yodha 4x4 Pickup LPS Pro Fight 2019-ah champion thar an awm dawn ta a ni.
February ni 27, Nilaini zan atangin quarterfinal khelh a ni dawn a, round nga zel an inhnek tawh ang. Chiang leh zualin boxer tha, fei leh thahrui ngah a lang dawn a, Zotea kalsan middle title rochuntu tur pawh rin lawk a awlsam tial tial dawn a ni.
Assam Regiment boxer Zotea hian zirna tharthawh lehin BA exam turin a inpuahchah. Hei vang hian Pro Fight hruihrual chhunga lut leh tura inbuatsaih a hautak tih a sawi a, zirlai lamah insawrbingin middleweight 'Title Fight' hmachhawn lo mai turin thutlukna a siam fel.
Sawleng tlangvalin title a kalsan avabg hian middle-ah champion thar an awm dawn. Weight dang angin title zawnna final khelh a ngai ve dawn lo va, final lit boxer pahnihin March 12 zanah 'Title Fight' an khel dun mai dawn a ni.
2009 khan Pro Fight championship tan a ni a, weight hrang pali - lightfly, bantam, light leh lightheavy-ah title an inchuh. 2010-ah middle belhin weight hrang panga a awm a, Zotea'n Lalngaihawma (Serchhip) hnehin kg 65-75 huanga champion hmasa ber a ni.
2011-ah Isak Rothangpuia (West Phaileng) hnehin a vawi khat nan Sawleng boxer-in kawnghren a humhum. 2014 Title Fight-ah Tuipui rawlthar HC Johnkenty Vanhlimpuia lakah title a hloh va, an inkhelh laiin a mitko a tauh kak a, thisen a chhuah nasat avangin a khel zawm thei lo va, pawi a ti hle.
2016-ah kir lehin lightheavy-ah champion lai Vana a insawn a, harsa lo takin Zotea'n middle kawnghren a hreng leh a, Title Fight-ah C Lalduhawma (Leitan) a knockout. Pro Fight hnuhnung ber 2017-ah Chhipchhip fighter Lalnithanga hnehin title a humhim leh.
Pro Fight middleweight 'Title Fight' vawi ruk awm tawhah tum nga Zotea a inlan a, vawi li chakin he huanga fighter hlawhtling ber a ni. Middle-ah hian mi pahnih chiah an la champion a, 2014 leh 2015-ah Tuipui boxer Vana'n kawnghren a hreng. 2016-ah lightheavy-ah insawnin a champion a, Vana hi Pro Fight chanchina weight hrang pahniha champion hmasa leh awm chhun a ni mek.
Tun tumah hian Zotea kalsan title rochun turin middle-ah hriat hlawh tak tak an inlar mek a, vawi li lightheavy-a champion tawh Abel Lalawmawia leh 2017 lightheavy Title Fight-a chak zo ta lo Lallawmkima Sailo, lightheavy-a khel ngar ngar thin H Lalrinhlua te chu a vawi khat nan middle-ah an inlan.
Zotea laka Title Fight-a tlawm tawh Duhawma'n a vawi khat nan champion tumin bul a tan tha ve leh mek a. Mizo boxer hriat hlawh tawhte bakah Manipuri boxer KH Sanamach Singh chuan middle title a chuh bawk.