Zanin zanlai hian Anthony Joshua leh Oleksandr Usyk-te chu an inhnek tawh dawn a, India-ah chuan zanlai (Sunday zingkar)-ah an inhnek dawn.

India-ah chuan TV lamah AJ vs Usyk hi live-a enna tur a awm dawn lova, mahse DAZN chu thla khat atan ₹69-a subscribe in, hetah hian an live dawn a, kan sanaah chuan zing lam dar 2 velah main event hi a nih a rinawm.

He fight hi a theuneu dawn lova, fighter pahnih te pawh an theuneu lo dun hle a, London-ah inbei dawnin, an inbeihna hmun tur hi Premier League club Tottenham home ground, mi 62,000 chuang lenna Tottenham Hotspur Stadium-ah a ni.

A hmunah mipui 67,000 vel awm tura ngaih a ni a, hetiang zat mipui an punkhawm chuan kum 2018-a Joshua-a’n Wembley Stadium-ah Alexander Povetkin a hneh hnua, British boxing event-a mipui tam leh berna a ni ang.

British boxer Joshua hian undisputed cruiserweight world champion hlui Usyk lakah hian a WBA, WBO, IBF leh IBO heavyweight title te a thap vek dawn a, hei hi Joshua-a'n a zawna vawi 11 title fight a neihna tur a ni dawn a ni.

Kum 31 mi unified champion lai Joshua hian a professional boxing career-ah fight 25 nei tawhin, heng zingah hian vawi 24 a chak a, nikum khan Andy Ruiz a hneh lo tih loh chu a la chak vek a, vawi 22 knock-out hmangin a chak tawh bawk.

Ukranian boxer kum 34 mi Usyk hian a professional career-ah hneh loh a la tawng lova, fight 18 a neih tawhah la chak vekin, vawi 13 lai knock-out hmangin a chak bawk a, a chet ran em avanga ‘The Cat’ an tih Usyk hian heavyweight division lamah Joshua-a hmaah fiahna tak tak a hmachhawn dawn.

A tirah Johua hian heavyweight division-a a belh neih loh awmchhun WBC title kawl tu Tyson Fury chu hmachhawn tur a ni a, mahse Fury hian Deontay Wilder a hmachhawn a ngaih leh tak si avangin Johsua hian WBO mandatory challenger Usyk hi a hmachhawn dawn ta zawk a, nakkumah undisputed world heavyweight champion zawnnaa Fury a hmachhawn duh chuan Joshua hian Usyk a hneh lo thiang lo a ni.

Tale of the Tape (Pic credit-The Sun):