Argentina rama Youth Olympics neih mekah Mizo rawlthar Jeremy Lalrinnunga chuan India chu bung thar a kaipui a, rit chawiah gold medal a la a, India tana Youth Olympics gold medal la thei hmasa ber a ni.
Kum 15-a upa Jeremy Lalrinnunga chuan men’s 62 kg Group A category-a pakhatna ni thei tur hian snatch-ah 124 kg a chawi a, clean & jerk-ah 150 kg a chawi leh bawk a, a belhkhawm hian 274 kg niin gold medal a dawng a. Silver medal latu Toptas Caner, Turkey chuan 263 kg a chawi a, bronze medal latu Estiven Jose Manjarres, Colombia chuan 260 kg a chawi bawk a ni.
October 26 a kum 16 tling tur Jeremy Lalrinnunga hian kumina World Youth Championship-ah silver medal a lo lak tawh bakah Asian Junior Championship-ah bronze medal a lo la tawh bawk a. India ram bikah phei chuan national record pahnih lai siamin khum theitu an la awm rih lo a ni.
Buenos Aires khawpuiah hian India chuan infiammi 47 a tir a, tun tum hi Youth Olympics-a tel tura infiammi a tirh hnem ber tum a la ni a. 2014 Youth Olympics khan Nanjing, China-ah India chuan medal pahnih an la a, kha kha an la chet that ber tum niin, tun tumah hian medal an la nual tawh a, Jeremy Lalrinnunga hian gold medal a la tel zui a, 2014 a record chu an khum chiang hle a ni.
India weightlifting head coach Vijay Sharma chuan, “Jeremy hi junior weightlifter ka hmuh tawh zawng zawngah chuan a la tha ber a. A theihna te ka en hian beiseina ka nei sang em em a. Kum thum vel chu senior ho bulah Patiala camp-ah kan lo hrual ve tawh a, tun hi a bul tanna tur chauh a la ni,” a ti.
Dronacharya Award dawngtu Vijay Sharma hian Commonwealth Games gold medalist Mirabai Chanu te pawh a lo hrual tawh thin a, Jeremy chu Olympic gold medal hial pawh la thei tura beiseiawm a nih thu a sawi a ni.
Govt. Complex rawlthar Jeremy Lalrinnunga hian kum 6 a nih atangin infiamna lampang a lo luhchilh tan tawh a. Mahse, a tirah chuan weightlifting hi a ti ngai lo a, a bul tanna tak chu boxing daih a ni.
Jeremy chuan, “Ka pa Lalneihtluanga hi national level boxer a ni a, gym velah training a neih hian ka zui ve thin a. Hetianga ka zui ve hian ka lo inzir ve thin a, boxing lamah ka mikhual loh phah a. Tum khat chu kan in bulah rit chawi thin pakhatin naupang a zirtir dawn tia an sawi ka hria a, boxing chauh ti loa rit chawi lampang tih ve chhin chu ka chak a, ka tel ve ta a ni,” a ti.
Coach Malsawma Khiangte chuan Jeremy Lalrinnunga hi a hrual chho a, 2011 atang khan boxing atangin weightlifting-ah hian Jeremy chu a inlet fel a. Malsawma hian Jeremy a kaihhruai chhoh chuan beiseina a nei sang hle a, a kum phu loin thahrui a nei tih a hmu a, Youth Olympics neih hma daih tawhin Jeremy chuan gold medal emaw, silver medal emaw a dawn tur thu a lo sawi lawk nghe nghe a ni.
Jeremy pa chuan Pune lamah a kalpui a, Army Sports Institute-ah a hruai a, trial neihpui dan a ngaihtuah a. Army Sports Institute hi India ram chhunga infiammi tha tak tak an fuankhawmna a ni a, Mission Olympics Programme hnuaiah infiammi naupang tak tak an hui khawm a, ram tihmingtha thei turin an chher chho thin a. ASI-ah hian infiamna peng hrang hrang 7 - archery, athletics, boxing, diving, wrestling, fencing leh weightlifting te an kalpui a ni.
Inelnaa a tel hmasak berah Youth National Weightlifting Championships-ah Jeremy chuan 50 kg category-ah national record ding lai chu a khum nghal a, a rit chawi belh khawm chu kg 198 a ni a. Hetianga hlawhtlinna hmel a hmuh nghal hnu hian coach Vijay Sharma chuan kg 50 atanga kg 56 a chho turin a lo fuih a, hemi category-ah hian ti chhoin Malaysia rama Youth World Weightlifting Championships-ah a rit chawi belhkhawm chu kg 234 niin silver medal a dawng a ni.
Medal a dawng chho deuh nual a, Commonwealth Youth Weightlifting Championships-ah gold medal pawh a la a, August thla khan kg 56 atangin kg 62 category-ah a chho leh a, a rit chawi theih hi kg 273 ngawt a ni tawh a. Thla thum kalta khan a chawi rih ber chu kg 250 niin, tunah chuan hei aia kg 23 ngawta rit a chawi thei tawh a ni.
2020, 2024 leh 2028 Olympics te chu a rawn inher chhuak ve leh mai dawn a, hengah te hian tuna kum 15 chauha upa Jeremy Lalrinnunga tan beiseina a awm thei chiang a. Khawvel hriatah Mizo tlangval hming a lang lo ang tih a sawi theih bik miah lo a ni.