June 25, 2020 (Ningani) zan khan Mizoram Football Association leh All India Football Federation chuan Mizorama youth football kalpui dan tur video conferencing hmangin an sawiho a, Mizoramah AIFF Youth League hrang hrang kalpui dan tur ruahman a ni.

AIFF lam hi I League CEO Sunando Dhar hoin League Department lam leh State Development lam enkawltute an tel a, MFA Executive Committee Member-te nen inkawmin MFA-in youth football kalpui dan tura ruahmanna a siam presentation an neih chu an thlirho a ni.

MFA lam hian AIFF Youth League hnuaiah Under 18, Under 15 leh Under 13 league kalpui dan tur ruahmanna a nei a, mipa tán mai ni loa hmeichhe tana kalpui dan turte pawh a duang.

AIFF lamin MFA ruahmanna neihte chu a thuphungin ṭha an ti a, a kalpui dan tur kimchang, sum senso ngai zat turte leh tih tur ṭul dangte ngaihtuaha sawiho leh turin an dah.

Sunando Dhar chuan, "AIFF Youth League kalpui ṭhin hi tunah chuan state thlan bikah an state chhunga kalpui ṭha kan ti a, chumi kalpui tur zingah Mizoram hi a tiṭha thei ber tur zingah kan ngai a, in ruahmannate pawh a ṭha kan ti a, rah ṭha a chhuah ngei ang tih kan ring," a ti.

MFA Honorary Secretary chuan," AIFF-in in duh ang diak diaka kalpui tur chuan khelmual indaih loh a na dâwn a, tuna kan program neih sate pawh hi khelmual a indaih loh ṭhin avangin kan duh ang thalin lan kalpui thei ṭhin lo. MFA chuan a tam thei ang ber District FA kuta daga, District hrang hranga football hmasawnna tura kalpui dan ruahmanna a siam ang, " tiin AIFF hotute a hrilh.