Manchester United-in tun nipui bazar hun laia FC Porto atanga an lakluh Portuguese full back Diogo Dalot chu tun hnaiah United manager Jose Mourinho chuan a chhawr rim tan a, Dalot hi la naupang hle mahse a khel chhe ngai lo hle.

Kum 19 mi manah hian United hian pound maktaduai 19 an senga, an lakluh tirh hian inhliamin, season bul pawh a tan ve lova, tunah erawh Premier League-ah hial inkhel bul a lo tan tawh. Mourinho chuan Fulham an hmachhawn zawhin Dalot chuan Gary Neville-a hnung a zui theih thu a lo sawi tawh a, Mourinho chuan, “ Gary Neville kha United first team tan a inlan tirh khan Dalot nen hian an inrual vel a, Dalot pawh hian Neville-a hnung zuiin, kum 10 lo awm turah hian United tlar hnung vengtu a ni thei. Kum 19 mi chauh a la ni a, hmasawnna tur tam tak a la neih avangin hei hi ka sawi a ni,” a ti.

United full back Ashley Young pawhin Dalot-a khel chu hmuhnawm a tih thu sawi ve in, “United a rawn zawm tirh khan a inhliam nghal a, chuvang chuan hun a mamawh rei deuh. Club chhung boruak a that em avangin kan bulah chuan tlangnel a awl hle.

“Dalot hi player naupang tak a ni a, mahse hun rei tak kan hnena awm tawh ang maia a khel hi mak ka ti a, a inkhel hi hmuhnawm ka ti hle a ni, “ a ti.

Dalot hi Porto chhulchhuak a ni a, United bakah hian Porto B leh Porto senior team tan bak a la khel lova, Portugal U15, U16, U17, U19, U20, U21 tante lo inlan tawhin, Portugal senior team tan erawh a la inlan lo a ni.