Yodha 4x4 Pickup LPS Pro Fight Round of 16 chu February ni 23, Inrinni zan khan khelh mek a ni a, February ni 25, Thawhtanni zan dar 8:00-ah khelh chhunzawm leh a ni ang a, inhnek vawi nga a awm ang.
Quarterfinal lut zawng zawng te February 26, 2019 - Thawhlehni zing dar 8-9 chhungin Hawla Indoor Stadium, Republic Vengthlangah Fight - Lightflyweight, Bantamweight, Lightweight leh Middlewwight inbuk tur a ni. Lightheavy boxer tan erawh inbuk a ngai ve lo vang. Semifinal khelh dawnah lightheavy telin inbuk that leh vek tur a ni ang.
February ni 23, Inrinni zan Bout 6 Results
Attendence - 635
LIGHTFLY
Pynskhem L Nonglait (Meghalaya) bt Lalchhuanmawia (Reiek)
= Split Decision (29-28, 28-29, 30-27)
Hnek chhuak tam zawk Pynskhem L Nonglait chuan mittlung takin khel bik lo mah se Lalchhuanmawia lakah split decision-in a chak a, quarterfinal a lut. Kum 21 mi Nonglait hian a tawp lamah a mitko ding lam a tauh kak a, harsatna a tawk zui ang em tih a hriat loh.
Vawi thum a zawna Meghalaya champion ni lai Nonglait hian phui taka inveng chungin a pan. State level-a gold medal panga la tawh Reiek boxer Chhuanmawia a inveng fimkhur hle a, hnek let tlem a, an inhnek tam lo dun viau bawk. State aiawha national championship vawi hnih khel tawh Nonglait chuan vawi thum vek hnek zawnin a fuh zauh zauh a, veikhawr Chhuanmawia'n a vei ngila hnek fuh chang a nei bawk.
Tharum nei leh a nawrtu zawk Nonglait chuan a vei lamah a vai fuh thin bakah thui taka a ding lam a hnek chhuah a chhawr tel. Round hnuhnung ber tawp lamah a mitko kak atanga thisen chhuakin a tibuai deuh a, kum 24 mi Chhuanmawia'n bawhin a hnek zawn nasa a, hun tawp lamah ngam takin an inhnek tawn hle a ni.
Judge pahnihin Nonglait an chaktir a, zirtawpni zan khan a thianpa leh kuttum hlauhawm tak Dondor Marwein chuan split decision thovin light-ah ZD Lalchhuanawma a hneh hram a, Meghalaya atanga tel boxer pahnihin quarterfinal an lut.
Lallawmawma (Tuipui) bt Lalpiangthara (Siaha)
= Unanimous Decision (30-27, 30-27, 30-27)
Veikhawr Lallawmawma'n thiam takin a vei lam a hnek chhuak a, thiamna hmangin tharum leh thahrui thei Lalpiangthara a thunun a, round tin la vekin chiang takin a tlang. Kum 16 mi Lawma hian quarterfinal-ah Meghalaya champion Pynakhem L Nonglait a su dawn a, February 28-ah an inkhel ang.
Tuipui rawlthar Lawma'n dik takin a kut a chhuah a, kum 22 mi Piangthara'n panin vawi li vel a hnek zawn a, awmzia a nei tam lo. A kut a kau tihin Lawma'n a hmaiah rang leh dik takin a hnek let a, a tir atanga a tawp thlengin Siaha fighter Piangthara'n panin khelh dan danglam a nei lo va, Lawma'n a taksa leh a hmaiah langsar takin a hneksak nasa.
Mizoram tana national junior bronze medal hnek chhuak tawh Lawma hian Pro Fight a khelh vawi hnihna a ni a, 2017 khan beiseiawm takin khel mah se a hriam tawk lo va, a thleng sang zo lo. Tun tuma a inlan vawi khatnaah puitling leh thiam takin Piangthara lakah a khel thei.
A khingpui nen an chet dan a inthlauin an kut chhuak a indik hleih hle. Thiamna leh hnek dan hmang tam zawk Lawma a langsar tluan a, GIG Motors Fighter of the Night lawmman a dawng.
BANTAM
HC Lalramfela (Chawngtlai) bt Henry Lalthazuala Chhangte (Chhipphir)
= Unanimous Decision (30-27, 30-27, 30-27)
Bantamweight title lak kir leh tumin HC Lalramfela'n fuh takin bul a tan a, Henry Lalthazuala Chhangte invenna hnek tlangin round tin a la vek. Chawngtlai chhuanvawr hian February 28-ah Niawhtlang boxer Vanlalzawna hmachhawnin quarterfinal a khel ang.
Kum 24 mi Ramfela'n inringtawk takin a tir atangin a khel a, inveng chungin Thazuala hnek letna remchhang a melh. Mahse, a invenna kutin Chhipphir boxer a chhan zo lo va, a dak fo va, Ramfela'n a taksa, a bek leh a hmaiah vawi nga vel a kut a chhuah zawn a, nuam ti takin a khel.
Tawn hriat nei lo huang atanga tlang kum 19 mi Thazuala vai fuh chang leh tha taka hnek let nei mah se a bet zawkah a tang tluan. An kutthlak leh chet vel dan a inthlau a, hnek na zawk Ramfela'n awmze nei thamin a kuttum a chhuah tam. Thazuala'n tuar viau mah se nghet takin a ding tluan a, a tawp lamah na takin a nawr a, chak zo lo mah se thahrui a nei tih a lantir.
2015 khan hriat hlawh lo takin Ramfela'n Lalnunhlua kut atangin title a laksak. Mahse, 2016-ah Zonuntluanga hneh lovin champion a nihna a humhim zo lo. Pro Fight hnuhnung ber 2017-ah Dinthar fighter Tetea kut atangin kawnghren lak kir tumin bei mah se a chak zo lo va, champion lai Tetea ngam lovin vawi hnih Title Fight-ah a tlawm zawn mek a ni.
LIGHT
Zomuansanga (Khatla South) bt Zonunzira (New Siaha)
= Unanimous Decision (30-27, 30-27, 30-27)
Khatla South boxer Zomuansanga'n harsatna lian tawk lovin Zonunzira a hneh a, a tawp lamah fual deuh mah se round tin la vekin quarterfinal a lut. Veikhawr Muantea hian fimkhur leh ngam tak siin a khel tluan a, New Siaha fighter Nunzira'n a bei let zo lo.
Kum 21 mi Muantea amah aia kum khata a naupang panin a nawrtuah a tang a, a ngila a vei lam a chhuah thin dang thei lovin Nunzira a buai a, a tirah lang thamin vawi thum a hnek fuh zawn nghal. Tawn hriat nei lo huang atanga tlang New Siaha tlangval Nunzira'n a boruakah a ngam lo va, tum dang aiin a hnek chhuak tlem a, a hnekin awmzia a nei tam lo hle bawk.
Round hnuhnung berah Nunzira'n a hmasa lam aiin a hnek chhuak tam. Muantea khel a tlahniam a, mahse, kut dik zawk a nihna chhawrin round hloh lovin a khel tluan thei. Khatla South tlangval hian quarterfinal-ah Vaitin boxer Boyka Lalhriatsanga a hmachhawn dawn a, February 28-ah an intawng ang.
MIDDLE
Lallawmkima Sailo (Chaltlang Lily Veng) bt Malsawmdawngsanga (Ramhlun South)
= Knockout (Round 1, minute 2:54)
Middleweight huanga a inlan hmasa berah Lallawmkima Sailo chuan round khat khel tluan lovin Malsawmdawngsanga a hnek tlu a, a taksaah vawi hnih hnek tluin minute 2:54-ah a knockout.
A tirah tawn hriat nei lo Ramhlun South boxer Malsawma'n umin Lawmkima'n a bei let mai lo. Mahse, Chaltlang Lily Veng fighter hian a vei lama a hnek fuh hnuin Malsawma a danglam a, inveng zuiin Lawmkima'n a nawr ve thung a, hual chepin a hnek.
Kum 25 mi Lawmkima'n a dingin a nak vei lamah a hnek a, kum 17 mi Malsawma a tlu. A thawh leh hnuah um zuiin a veiin a nak ding lamah a hnek leh a, Ramhlun South rawlthar tluin referee Suakchhinga'n vawi 10 chhiarin a titawp.
Pro Fight hnuhnung ber 2017-ah Lawmkima'n lightheavy huangah khelin Title Fight-ah champion lai HC Johnkenty Vanhlimpuia a hneh lo. Tun tumah middle-ah insawnin chona thar a hmachhawn mek a ni.
K Lalpianglawma (Sihtlangpui) bt Joseph VL Dinsanga (Lunglei)
= Walk over
Mimal harsatna a neih avangin Lunglei tlangval Joseph VL Dinsanga a inlan lo va, awlsam takin Sihtlangpui boxer K Lalpianglawma'n quarterfinal a lut. March 1-ah inhnek hautak a hmachhawn zui dawn a, Lallawmkima Sailo nen semifinal luh an inchuh ang.
February ni 25, Thawhtanni 8:00PM Bout 5 -Round of 16 Fixtures
LIGHTFLY
Gregor Joseph (Sailulak) v Zorammuana (Tuipui)
BANTAM
Ramdinsanga (Tuipui) v Yuri Lalbiakdika Sanate (Vaitin)
Malsawmkima (Muthi) v W Alexander Meitei (Manipur)
MIDDLE
T Lalbiakthuama (Luangmual) v H Lalrinhlua (Hnahthial)
KH Sanamach Singh (Manipur) v Timothy Lalbiakdika Nungate (Muthi)