Yodha 4x4 Pickup LPS Pro Fight quarterfinal chu February 27, Nilaini zan kha R Dengthuama Indoor Stadium, Mualpuiah khelh a ni a, inhnek vawi ruk a awm. 

February ni  27, Nilaini 8:00pm - bout 6 results

LIGHTFLY

Heli Tana Tara (Arunachal Pradesh) bt C Zosangmawia (Chaltlang)

= Unanimous Decision (50-45, 50-45, 50-45)

Heli Tana Tara chuan thiamna tha tak lantirin C Zosangmawia a thunun a, round nga la fai vekin unanimous decision-in a chak. Kum 20 mi Tana Tara hian semifinal a lut a, Arunachal Pradesh atanga boxer tel pathum zinga thleng sang ber a ni.

Arunachal Pradesh aiawhah vawi thum national championship khel tawh Tana Tara hian a chet vel dan leh hruihrual a hman dan atangin Zosangmawia aiin a chungnung tih a lantir. Panin fuh takin a vei leh dingin a hnek zawn a, tha takin a vai tawn bawk a, thiamna hmang tam leh hnek dik zawk a nih avangin a langsar tluan.

Kum 20 mi ve bawk Chaltlang boxer Zosangmawia'n a ngila a vei leh ding a chhuah zawn thin bak chet dan danglam a nei tam lo va, a tuan a fumin chet zung zung a harsat zawk bawk. Fuh taka hnek fuh nei thin mah se a chhang let zo lo va, a tawp lamah tlafualin a bet viau a, khan sang leh ban sei zawk ni mah se thiamna leh tawn hriatah a pha lo.

Arunachal champion vawi hnih ni tawh, feet 5 leh inchi 2-a sang Tana Tara chuan round hnuhnung berah a khelh dan a tidanglam. Tawlh kualin a hnek thut thin a, thiam takin a thahrui a hmang a, hnaihchilhin Zosangmawia taksa leh a hmaiah a hnek zawn a, a tawp thlengin mar leh mittlung takin a khel.

F Zoramchhana (Cherhlun) bt H Lalnunhlima (Tuipui)

= Unanimous Decision (48-47, 48-47, 50-45)

Rang taka hnek zawnin F Zoramchhana'n a dinhmun a siam a, a tir lamah chet harsat deuh mah se unanimous decision-in H Lalnunhlima lakah a chak. Cherhlun fachuam hian semifinal-ah Arunachal chhuanvawr Heli Tana Tara a su dawn a, March 4-ah an inhmachhawn ang.

Kum 19 mi Zotea'n amah aia kum thuma naupang Tuipui rawlthar panin ngam takin a bei. Mahse, tha taka inveng chungin Nunhlima tlang tha takin a hnek let a, round hnihna thlengin Nunhlima kutchhuak a dikin a ngila a vei leh ding a hnek zawn thin chuan lehlam tan harsatna a siamsak.

Thahrui bei leh bei ngawrh Zotea'n hnaihchilhin rang takin a vai a, a tir lamah hlawhtling tawk lo mah se round thumna atangin a hnek hneh a, a vai fuh nasa. Nunhlima a tlahniam ve thung a, a tawp round hnihah kut rang tak Zotea'n vawi li atanga vawi ruk vel hnek zawnin Tuipui rawlthar a inveng seng lo.

Nung leh ngam takin Zotea'n a bei tluan a, zei taka che velin hruihrual chhung a hmang a, kawng hautak hmasa a hnek tlang. Pro Fight hnuhnung berah Title Fight a khel tawh a, tuan rang, thahrui ngah leh hnek zawn thei tak NT Lalbiakkima lakah a chak zo lo va, hmasawn ngei tumin kuminah a inlan.

BANTAM

Laldingliana (Tuipui) bt Kogam Potom (Arunachal Pradesh)

= Unanimous Decision (50-45, 50-45 49-46)

Thiam taka inveng chungin Laldingliana'n Kogam Potom a hnek hnem hle a, round tinah chungnung vekin unanimous decision-in a chak. Tuipui boxer hian kawng hrang hrangah Arunachal fighter a chungtlak hneh a, nuam ti taka chhaih kual chungin a tawrhtir viau a ni.

Kum 20 mi Dingliana'n a tir atangin fimkhur leh puitling takin a khel a, ban sei zawk a nihna thiam takin a hmang. Kum 21 mi Potom chuan panin a hnek chhuak zawn viau thin na a, thleng pha lo a tamin tawlhsawn pahin Dingliana a inveng bawk a, dik tak takin a vei leh dingin a hnek let.

An kutchhuak a inthlau va, Tuipui boxer-in lang thamin a hnek fuh fo va, Potom erawh chuan round nga an inbeih chhungin hnek fuh a harsat tluan zak. Arunachal boxer hian Dingliana'n rang leh thui taka a vei leh ding a chhuah zawn thin a veng hneh lo bawk a, vawi ruk vel hnek zawnin bei ngial thin mah se Tuipui tlangvalin a dawng tam lo.

Vawi hnih Arunachal champion ni tawh Potom a talbuai hle a, a vai thlawn nasa. Mizoram aiawha feh chhuak fo tawh Dingliana'n vawi thum vawi li vel hnek zawna a nawr changin a hlawhtlinpui hle thung a, chiang takin a chak a, GIG Motors Fighter of the Night lawmman a dawng nghe nghe a ni.

Lalrinsanga Tlau (Khawruhlian) bt Lalremsanga (Lungleng I)

= Unanimous Decision (50-44, 50-44, 50-44)

Lalrinsanga Tlau chuan hneh takin Lalremsanga a awpbet a, round tin a lak bakah vawi khat a hnek tlu a, unanimous decision-in a chak. Judge pathumin 50-44 vekin an chaktir a, Khawruhlian boxer hian semifinal-ah Tuipui beisei Laldingliana a hmachhawn dawn a, March 4-ah an intawng ang.

Veikhawr Rinsanga'n thiamna kawngah a thunun a, rang tak siin chi hrang hrangin a hnek zawn a, a vei lam thui taka a hnek chhuah thin hmangin a tibuai tel nasa hle bawk. Round hnuhnung berah a vei lamin a hnek tlu a, Kum 22 mi Remsanga tho lehin a bet zui na a, fei takin a ding tluan hram.

khel mah se tawn hriat a nei tam lo ang bawkin

Kum 18 mi Rinsanga panin a hual chep hneh thin viau a, an inhnek tawn laiin awm hmun sawn pahin nalh takin a dawng thin a, an khelh dan a inthlau. Lungleng I tlangval Remsanga'n thiamna lamah a cho phak lo va, hnek fuh zauh thin mah se a tuar tam. Chet a harsat tluan a, hnek let lova inven ringawt chang a nei bawk a, Rinsanga kut tuarin a tawp lamah a hnar a thi nasa viau bawk.

Round ngaah Rinanga'n a vei lamah a hneh zawn bakah a dingin a um zui tel a, Lungleng I boxer a talbuai leh zual. Remsanga hian nawr let tuma an bawh laiin Rinsanga a veiin a bekah chiang takin a hnek tlu a, tho leh mah se Khawruhlian rawltharin um zuiin a tawp thlengin a nuai.

LIGHT

Vanlalawmpuia (Khuangthing) bt C Lalhruaitluanga (Mualpui, ITI)

= Technical Knockout (Round 1, second 1)

Vanlalawmpuia'n awlsam takin semifinal a lut a, quarterfinal-a a bitum tur C Lalhruaitluanga'n a kut a tina a, khel turin hruihrual chhungah lut mah se an tan chiah tihin a inhnukdawk.

MIDDLE

Abel Lalawmawia (Serchhip) bt Laltanpuia Renthlei (Hnahthial)

= Unanimous Decision (50-45, 48-47, 48-47)

Weight hrang pahniha champion nih a tumna kawngah Abel Lalawmawia'n rahbi a tuk sang zel a, Laltanpuia Renthlei lakah hnek chhuak tam leh bei ngawrh zawk a nihna chhawrin unanimous decision-in a chak.

Serchhip chhuarvawr Abela hian round tinah a hnek chhuak tam zawk hle vek a, Hnahthial boxer Tanpuia a inveng phui hle thung. Kum 32 mi Abela hian lang tham khawpa hnek nei tam lo mah se Tanpuia taksaah a hnek tam a, a bekah vai fuhin a kut karah a hnek tlang fo bawk.

Kum 28 mi Tanpuia'n ruahmanna a siam fuh teuh viau a, tha taka inveng chungin fuh takin a hnek let thin. Mahse, chakpui tham a hnek chhuak lo va, a tir round li chhung invengin a khat tawkin a hnek let a, vawi hnih aia tam a kut a chhuah zawn mang lo.

Round hnuhnung berah erawh Tanpuia'n nawr letin a hnek chhuak tam a, inven lama harsarna tawk fo thin Abela'n round dang aiin a dawng hnem. Mahse, Serchhip fighter hian a tir atanga a tawp thlengin fual nei lovin a pan a, a hnek chhuak reng a, judge pahnihin 48-47 in an chaktir a, pakhatin round tinah 50-45 in a chaktir a ni.

Middle-a a khelh vawi hnihna niin a hma aiin Abela'n inven lamah hma a sawn. Lightheavy-a vawi li champion tawh 26 Assam Rifle boxer hian fiahna hautak zawk a hmachhawn zui zel dawn a ni.