Yodha 4x4 Pickup LPS Pro Fight Round of 16 chu R Dengthuama Indoor Stadium, Mualpuiah February ni 25, Thawhtanni zan khan khel chhunzawm a ni a, inhnek vawi ruk a awm.
February ni 25, Thawntanni zan Results
LIGHTFLY
Zorammuana (Tuipui) bt Gregor Joseph (Sailulak)
= Unanimous Decision (29-28, 30-27, 29-28)
Veikhawr Zorammuana'n dik leh mar tha taka a vei lam a hnek chhuah thin chhawrin, Sailulak beisei Gregor Joseph-a lakah unanimous decision-in a chak.
Kum 16 mi Zorammuana'n tawn hriat leh thiamna a neih a hmang tangkai. Amah aia kum 19 mi Joseph chuan panin a hnek chhuak viau a, mahse, tha taka Tuipui rawlthar a inven avangin hnek fuh a harsat tluan. Zorammuana'n a ngilin a ding leh veiin dik takin a lo hnek let.
Tawn hriat nei lo huang atanga tlang Joseph-a'n thahrui a nei tha a, a tawp thlengin a nawrtu zawkah a tang a, vai fuh pawh a nei fo. Mahse, thiamna leh chet ziaah Zorammuana a chungnung a, a vei lam mar taka a chhuah thin hmangin Sailulak boxer a tibuai hle.
A vawi khat nan a sang pariat zingah Tuipui rawlthar a inhlangkai. Pro Fight-a a tel vawi hnihna niin National School Games leh Khelo India-a silver medal la tawh Zorammuana'n March 1-ah semifinal luh tumin Sihphir boxer F Lalmuanzuala a bitum leh dawn ni.
BANTAM
Yuri Lalbiakdika Sanate (Vaitin) bt Ramdinsanga (Tuipui)
= Split Decision (28-29, 29-28, 29-28)
Yuri Lalbiakdika'n tlo leh fei takin a khel a, a tir lama a ngam loh Ramdinsanga lakah rouns hnuhnun pahnih lain unanimous decision-in a chak a, quarterfinal-ah Manipur boxer W Alexander Meitei suin fiahna hautak zawk a hmachhawn ang.
Kum 22 mi Biakdika hian a tir lamah Tuipui rawlthar Dinsanga a hnek fu thei mang lo va, a dawng hnem. Kum 18 mi Dinsanga'n amah pana hnek hmasatu Vaitin boxer kut a chhuak tihin dik takin a hnek let a, tha taka inveng chungin langsar takin a khel thei.
Mahse, round hnihna atangin thahrui nei Biakdika'n a nawr hneh a, a hnek chhuak tam. Dinsanga'n tha takin hnek let tho mah se a inveng seng tawh lo va, tharumah a ngam lova thiamna nei zawk mah se a tlahniam hret hret.
Vaitin chhuanvawr Biakdika'n a tir atangin a pan a, a ngilin a vei ding chhuah zawnin vawi nga vel a hnek zawn a, lehlamin hnek let mah se a pan zel. Round hnuhnung berahh Dinsanga a chau hle a, awmze nei thamin a hnek let tawh lo va, a inveng tam hle.
Pro Fight hnuhnung berah final lut leh hmingchher tawh Biakdika'n a tawp lamah chiang tak takin a hnek fuh. A um a, chawl lovin a tawp rat thlengin a bei a, a theihna tha takin a hmang a, hnehna a sual chhuak.
Round hmasa berah hlawhtling lo mah se ropui taka a beih let dan avangin GIG Motors Fighter of the Night-ah thlan a ni a, March 1-ah a inlan leh ang.
W Alexander Meitei (Manipur) bt Malsawmkima (Muthi)
= Unanimous Decision (29-28, 29-28, 29-28)
Mizorama a inhnek hmasak berah mittlungin W Alexander Meitei inlan phak lo mah se tawn hriat a neih hmangin Malsawmkima a hneh a, a tir leh a tawpah che thain unanimous decision-in a chak.
Kum 20 mi Alexander hian inringtawk leh ngam takin bul a tan a, kum 15 mi Sawmkima a bet nghal. Round hmasa berah Meitei boxer-in nuam ti takin a khel a, hual chepin a hnek nasa a, Muthi rawltharin a theihna hmang khawpin a bei let lo va, inven lamah a insawrbing.
Round hnihnaah Sawmkima a danglam a, panin a hnek zawn nghal a, a khelh dan thakin ngam takin a bei. 2015 World Junior Championship-a India aiawh tawh Alexander a che buai a, Pro Fight vawi khat khelhna Sawmkima'n lang thamin a hnek fuh fo va, mipui au thawm a tha hle.
Sawmkima hian a ban seina a hmang tha hle a, chak thei hial turin round hnihna a thunun. Mahse, round hnuhnung berah Alexander insiam thain phui zawkin a inveng a, tharum nei zawkna a nihna hmangin a hnek hneh a, a dinhmun a siam thei.
Pro Fight-a a tel vawi khatnaah Sawmkima'n fak hlawh takin hun a hmang. Manipur boxer hmaah a naupanna a lang a, a tir lamah chiai deuh mah se a theihna ngampa taka a hman rualin a invawrh sang a, a tawpah thahrui a neih tawk loh a tuar.
MIDDLE
H Lalrinhlua (Hnahthial) bt T Lalbiakthuama (Luangmual)
= Knockout (Round 2, minute 1:15)
Middle huanga a inlan hmasak berah H Lalrinhlua'n nuam ti takin a khel a, rouns hnihnaah T Lalbiakthuama a knockout. Hnahthial tlangval hian vawi hnih hnek tluin a hnuhnung zawkah Luangmual boxer a tho thei tawh lo.
Tawn hriat nei lo kum 33 mi Biakthuama'n round hmasa berah a hnek nasa a, Rinhlua'n chhaihin tlang tha takin a hnek fo naa a nawr let mang lo. Luangmual fighter-in a vai fuh thin mah se an khelh dan leh che ziaah lehlam a pha lo va, an kutchhuak pawh a inthlau.
Kum 21 mi Rinhlua'n round hnih an tan rualin thapuiin a nawr a, a hnek chhuak nasa a, Biakthuama talbuaiin a bei let thei lo. Hnahthial boxer hian a vei leh ding zawnin a hnek tlu a, a tho leh hnuah hual chepin vawi nga a hnek fuh zawn a, chhuatah Biakthuama a tlu thlawrh a, a tawp thlengin a che chang zui lo.
Lightheavy title chuh tur zawnna final khel tawh Rinhlua'n middle huanga fuh takin bul a tan. March 1-ah tharum leh thahrui ngah Manipur boxer KH Sanamacha Singh nen semifinal luh inchuhin an innuai dawn a, fiahna pawimawh a ni ang.
KH Sanamacha Singh (Manipur) bt Timothy Lalbiakdika Nungate (Muthi)
= Knockout (Round 2, minute 1:20)
KH Sanamacha Singh chuan hlauhawm takin a kuttum a chhuah a, hneh takin Timothy Lalbiakdika Nungate a hnek a, round hnihna laihawlah a knockout. Manipur fighter sa tha leh sek tak hian quarterfinal-ah Mizo boxer langsar zinga mi H Lalrinhlua a hmachhawn dawn.
2018 Manipur champion Sanamacha chuan thiamna danglam tak hman a nei lo va, a bitum panin a hnaihchilh rualin a hnek chhuak. Muthi rawlthar Biakdika'n chet vel a awlsam zawk a, a tuan a tha zawk bawk a, tha taka a hnek let rualin a tawlhsawn.
Sanamacha chuan hual chep fuhin a hnek zawn a, a kapah hnek telin kum 16 mi Biakdika a tlu. Referee Vulthavunga'n a chhiar a, chutih rualin Manipur boxer point a paihsak bawk.
Round hnihnaah Sanamacha chuan ngam takin a nuai a, na tak takin a ding lamin hnek nasa. Biakdika'n tharum leh thahruiah a ngam lo va, a chhang let zo lo tawh lo. Kuna a inven laiin Sanamacha chuan dawm tlangin a hmaiah a hnek zawn a, Muthi rawlthar tluin a tho chhuak tawh lo. Minute 1:20-ah Vula'n inhnek a titawp.
Manipur fighter pahnihin Muthi boxer ve ve an hneh a, thiamna sang tak aiin an bitumte nawr hnehin an hnek chhuak tam a, inhawng takin an bei. Sanamacha phei chuan tharum leh a kuttum a hmachhuan leh zual a, a inhnek erawh a hmuhnawm.