Yodha 4x4 Pick-up LPS Pro Fight khelh mekah February ni 13, Nilaini zan inhnek vawi sawm pahnih a awm leh a, hetiang hi results a ni. February ni 14, Ningani zan chhunzawm leh a ni ang a, inhnek vawi sawm awm ang.
February ni 13, Nilaini zan - Bout 12 Results
LIGHTFLY - bout 4
Laltlanmawia (New Chalrang) bt Zorinpuia (Thenzawl)
= Split Decision (29-28, 28-29, 29-28)
An innuai nasa a, hneh fuh pangngai tak a tam lo va, thiamna hmang tam zawk New Chalrang boxer Laltlanmawia a chungnung hret. Zorinpuia thahrui a nei viau a, thiamna a tlachham ve thung a, an inbeih chhungin inchhaih kual vel awm lovin an inhnek tawn hle a ni.
C Rualthankhuma (Farkawn) bt Lalrohlua (Kanan)
= Unanimous Decision (30-26, 30-26, 30-26)
C Rualthankhuma'n langsar thamin a thunun a, Lalrohlua'n lehlam khelah a hnek fo avangin hremna tuarin a point paihsak a ni. Thankhuma'n a ngila a vei leh ding a chhuah zawn thin a chhawr a, Kanan boxer Rohlua erawh chuan chet a harsat tluan.
Lalruatsanga (Khawzawl) bt Lalchhuanawma (North Hlimen)
= Knockout (Round 2, minute 2:36)
Nung tha takin a tir lamah an inhnek tawn a, thiamna nei zawk Lalruatsanga a langsar telh telh a, a hnek chhuak tam zawk bawk. Round hnihnaah Lalchhuanawma a talbuai a, Ruatsanga nawr hnehin vawi nga a hnek zawn a, Chhuanawma tluin referee Rosema Colney chuan a chhiar a, a tho chhuak zo lo.
Jacob Lalremsanga (Bairabi/Republic Veng) bt David LZ Ralte (Chanmari West)
= Knockout (Round 2, minute 2:37)
David LZ Ralte chuan bawh nghalin a vei leh dingin a hnek zawn a, Jacob Lalremsanga a tlu. Mahse, pumraw lian zawk leh veikhawr Remsanga'n ropui takin a bei let a, hneh takin a nuai zui. Round hnihnaah tharum nei leh kutthlak na zawk Bairabi boxer Remsanga'n chhiar ngaiin vawi hnih a hnek tlu a, a hnuhnung zawkah David-a a tho chhuak thei tawh lo va, round hnih khel tluan lovin Remsanga a chak.
BANTAM - bout 4
Lalramzauva (Muthi) bt Malsawmdawngkima (Tlangnuam)
= Unanimous Decision (30-26, 30-26, 30-26)
Lalramzauva'n hmuhnawm tham takin a khel a, kawng engkimah Malsawmdawngkima a bet. Muthi tlamgval Ramzauva hian a hnek hnem viau a, Dawngkima'n a ban sei zawkna chhawr thei lovin a tuar nasa. Round thumna tawp hma lawkin Ramzauva'n a chungnunna tifiahin a dingin a hmaia a hnek tlu a, knockout pumpelhin Tlangnuam boxer a tho leh a, hun a tawp zui.
Siam Lian Ding (Bawngkawn South) bt C Vanlalruatsanga (East Lungdar)
= Unanimous Decision (30-27, 30-27, 30-27)
Thiamna tha pangngai tak nen boxing en tlak tak an entir ve ve a, a pantu leh hnek chhuak tam zawk Siam Lian Ding chuan round tin la vekin C Vanlalruatsanga a hneh. Veikhawr Siam Lian Ding hian a ngilin tlang tha takin a hnek fuh fo va, Ruatsanga'n vai let thin mah se a bet zawkah a tang a, a inveng nasa zawk bawk.
Malsawmkima (Muthi) bt F Ramchhuanmawia (New West Phaileng)
= Unanimous Decision (30-26, 30-26, 30-26)
Muthi rawlthar Malsawmkima'n nuam ti takin a khel tluan thei a, a ruh la no deuh mah se F Ramchhuanawma hmaah puitling takin a khel a, thiamna kawngah a chungtlak. Chhuanmawia'n beih viau tum thin mah se chet a harsat a, awmze neiin a hnek chhuak thei lo va, kum 15 mi Sawmkima'n phu takin a khel a, hmasawn zel thei turin beiseiawm takin a inlan tel bawk.
Zairemmawia (East Lungdar) bt Lalduhawma Biate (Vaitin)
= Split Decision (30-27, 29-28, 28-29)
Zairemmawia a ngila a hnek chhuah thin a chhawr a, a tir atanga a tawp thlengin inngamtawk leh inhnehtawk takin Lalduhawma Biate nen inbei mah se a pawng zawk hret. East Lungdar tlangval hian a thunun thei bik lo hle na a, Duhawma'n hnek fuh a harsat a, thiamna an neih san tawk loh ve ve avangin a hmuhnawm zo lo.
LIGHT - bout 4
Zonunzira (New Siaha) bt K Lalzirmawia (Chhingchhip)
= Knockout (Round 2, minute 2:40)
Zonunzira'n hneh takin a awpbet nghal a, thiamna tlachham K Lalzirmawia a talbuai a, tharumin bawh viau tum mah se a hlawhchham. New Siaha fighter Nunzira'n a hnek tam hle a, round hnihna vawi nga hnek zawnin Zirmawia a thu hnawk a, referee C Vanlalchhuanga a chhiar laiin tho chhuak leh mah se Nunzira'n nawr nghalin a hnek tlu leh a, a tho chhuak tawh lo.
Sena Tuallawt (Nursery) bt R Malsawmsanga (Kolasib)
= Majority Decision (28-28, 29-27, 29-27)
Thiamna aiin tharumin an innawr nasa a, round hmasa pahnihah Sena Tuallawt chuan a ngam zawk a, a vai fuh fo. Khan sang zawk R Malsawmsanga a kun nasa a, referee Lalchhanhima Hnamte chuan a point a paihsak. Round thumnaah erawh Sawmsanga'n chiang takin a awpbet a, hnek tluk tumin a bei ngawrh. Sena a chau hle naa a ding tluan hram a, thahrui nei zawk Sawmsanga'n a tir lama a chet chhiat bakah point paih a tuar.
Lalruatkima (Model Veng) bt Lalrinfela (Sairang Dinthar)
= Unanimous Decision (30-27, 29-28, 30-27)
Kutthlak na leh dik zawk Lalruatkima'n Lalrinfela lakah fiahna tling inhnek a pal tlang. Thiamna tha pangngai tak nen an inbei tawn a, tha taka inveng chungin an inep a, a awl lai zawngin an inhnek. Ruatkima kut a rang a, inhnek tawnah a tha zawk bawk a, a lu leh a taksaah a hnek ve ve a, Rinfela dik taka vai chhuah nei thin mah se a dinhmun a siam zo lo va, tharumah a pha lo deuh bawk.
Lalawmpuia (Tanhril) bt PC Rosangpuia (Tlangnuam)
= Unanimous Decision (29-28, 29-28, 30-27)
Veikhawr Lalawmpuia'n panin a hnek chhuak tam a, khan sang zawk PC Rosangpuia'n ban sei zawk a nihna chhawr thei lovin Tanhril boxer-in a bawh buai hneh hle. Inhnek fuh chiang tak a tam lo va, Awmpuia' a ngila rang taka a vei lam a chhuah thin a tangkaipui a, inhnek fuh a tam loh avangin boruak a dul viau a ni.
February ni 15, Zirtawpni 8:00PM - Bout 10 Fixtures
LIGHTFLY 4th Round - bout 3
Laltlanmawia (New Chalrang) v C Rualthankhuma (Farkawn)
Lalruatsanga (Khawzawl) v Jacob Lalremsanga (Bairabi/Republic Veng)
PL Lalchhanchhuaha (Saichal) v Hmingthanmawia (GSA ITI Veng)
BANTAM 3rd Round - bout 4
Gospel Lalramthlana (West Phaileng) v Lalramzauva (Muthi)
Henry Lalthazuala Chhangte (Chhingchhip) v Siam Lian Ding (Bawngkawn South)
Nazareth Lalthazuala (Zemabawk) v Malsawmkima (Muthi)
Lalthlangliana (Khuangleng) v Hmingchungnunga (Rawpui)
LIGHT 3rd Round - bout 2
Lalnunmawia Sailo (Serchhip) v Lalhruaisanga (Ramhlun North)
Remruatfela (Kawlkulh) v Lalawmpuia (Tanhril)
MIDDLE 1st Round - bout 1
Lalhmingmawia (Thuampui) v Lalthanzuala (Phulmawi)