Yodha 4x4 Pick-up LPS Pro Fight chu February ni 12, Thawhlehni zan khan chhunzawm a ni a, inhnek vawi sawm pahnih a awm. February ni 13, Nialini zanah chhunzawm leh a ni ang.
Results
LIGHTFLY - bout 4
JH Rosangpuia (Zemabawk North) bt Lalhmingmawia (Saithah)
= Majority Decision (28-28, 29-27, 29-27)
JH Rosangpuia'n a hnek chhuak tam a, a tir lamah a taksa leh a hmaiah hnek zawnin boxing tha pangngai a lantir. Mahse, Lalhmingmawia'n fei takin a bei a, round hnihna tawp lam atangin an chau dun viau a, round hnuhnung berah Zemabawk North boxer Rosangpuia a chau leh zual a, a tluk avangin referee Abhisek Vanlalmawii'n a chhiar hial. Mahse, hnek fuh tam leh thiamna nei zawk Rosangpuia a tlang.
Lalmuanpuia (East Lungdar) bt Lalremkima (Saikhamakawn)
= Unanimous Decision (30-27, 29-28, 30-27)
East Lungdar tlangval Lalmuanpuia'n ngam takin a bei a, luhchilhin dik takin a dingin a hnek do. Khan sang leh ban sei zawk Lalremkima'n chet a harsat a, a ban seina a chhawr thei lo va, inhnek tawnah pawh feet 5 tling lo Muanpuia a tha zawk a ni.
PL Lalchhanchhuaha (Saichal) bt Lalpektluanga (Darlawng)
= Unanimous Decision (29-28, 29-28, 30-27)
An fimkhurin an inveng tawn hle a, inhnek fuh a awm mang lo. Veikhawr PL Lalchhanchhuaha'n a ngilin a ding leh veiin a hnek fuh zauh zauh a, Lalpektluanga'n nawr nasa zawk mah se awmze neiin a kut a chhuah mang lo.
Hmingthanmawia (GSA ITI Veng) bt Francis Lalrinngheta (Edenthar)
= Unanimous Decision (30-27, 29-28, 29-28)
Hmuhnawm leh ngam takin an inhnek tawn a, Francis Lalrinngheta'n a pan a, vei leh ding a ngila a chhuah laiin rang takin Hmingthanmawia'n vawi hnih aia tam a hnek let fo. Chiang tak takin an inhnek fuh tawn ve ve a, inhawng takin an inbei dun a, ban sei zawk Rinngheta'n ruahmanna siam fuh tawk lovin a hnaih chilh thin a, Thanmawia'n thiamna tha tak lantirin a dinhmun a siam.
BANTAM - bout 4
Gospel Lalramthlana (West Phaileng) bt Lalnunpuia Varte (Ramhlun North)
= Unanimous Decision (29-27, 30-26, 29-27)
West Phaileng boxer Gospel Lalramthlana che fuh nghalin a hnek nghing lawih a, referee Zonunmawia'n chhiarin Lalnunpuia Varte chuan a tawp thlengin bei let zui mah se a bet zawkah a tang tluang. Inhnek tawk viau chungin Gospela kutchhuak a dikin thiamna tha pangngai tak a lantir a, Nunpuia'n a theihna awmze neiin a hmang thei tawk lo va, thiamna kawng hrang hrangah a khan lo deuh.
Henry Lalthazuala Chhangte (Chhipphir) bt Malsawmdawngliana (Kawrtethawveng)
= Unanimous Decision (30-27, 29-27, 30-27)
Henry Lalthazuala Chhangte chuan nawrin hneh takin a thunun thei a, Malsawmdawngliana'n tawlh pahin a hnek let a, chakpui thamin a inlan phak lo. Round tinah an inbeih dan a danglam lo va, harsa lo takin Thazuala a chak.
Nazareth Lalthazuala (Zemabawk) bt Lalbiakzuala (New Vervek)
= Split Decision (29-28, 29-28, 28-29)
An thiam a inchenin an inbei tawk hle a, an inchet that chhawk. Nazareth Lalthazuala a insawrbing tha zawk a, New Vervek tlangval Lalbiakzuala'n a che ziain boruak a siam a, a tawp thlengin a phur viau. Mahse, Thazuala a kuttum hmangin a tawpah thuneihna a chang a, inhneh tawk tak karah a tlang hram.
Hmingchungnunga (Rawpui) bt Lalruatfela (Edenthar)
= Split Decision (28-29, 29-28, 29-28)
Rawpui boxer Hmingchungnunga'n panin nghet tha takin a khel a, Lalruatfela'n fuh taka hnek let nei thin mah se a dinhmun a siam phak lo. An inngam tawkin an inhnek tawn dun hle a, Ruatfela'n a ngila vei ding a chhuah zawn laiin Rawpui tlangvalin a vai hneh ve thung a, chak zawk hriatthiam harsa tak karah Hmingchungnunga a pawng hret.
LIGHT - bout 4
Lalnunmawia Sailo (Serchhip) bt
T Lallianmawia (Zuangtui)
= Unanimous Decision (30-27, 30-27, 30-27)
Serchhip boxer Lalnunmawia Sailo chuan hnek takin a thunun tluan a, thiamna tlachham T Lallianmawia'n tharumin a nuai a, awmze neiin a hnek chhuak mang lo. Nunmawia'n a hnek tam a, round hnihnaah Lianmawia a tal chhuak hram a, round tawpah erawh a bei let nasa a, awmzia erawh a nei tam chuang lo.
Lalhruaisanga (Ramhlun North) bt Hmangaihpara (Hortoki)
= Split Decision (29-28, 29-28, 28-29)
Hmangaihpara'n a bei ngawrhin a bawh nasa a, awmze nei tham khawp erawh a tam lo. Lalhruaisanga kutchhuak a dik zawk a, inveng chunga a hnek thin a chhawr. Thiamna an nei sang tawk lo ve ve a, nung leh hmuhnawm thamin an inlan zo lo va, inhnehtawk takin an inbei tluan.
C Lalhruaitluanga (ITI, Mualpui) bt Lalthanpuia (East Phaileng)
= Unanimous Decision (30-25, 30-25, 30-25)
C Lalhruaitluanga'n thiamna tha pangngai tak nen mar tha takin a khel tluan a, fuh leh dik taka a hnek chhuah tuar lovin chhiar ngai khawpin vawi hnih Lalthanpuia a chiai. Mahse, East Phaileng boxer a mikhual bik lo va, bet zawk viau chungin a tawp thlengin a ding tluan a, kawng hrang hrangah Hruaitluanga a chungnung zawk.
Remruatfela (Kawlkulh) bt Eliza (Bilkhawthlir)
= Unanimous Decision (29-28, 29-28, 29-28)
Inhnaihchilhin an inbei tawn nasa a, Remruatfela'n a ngilin a hnek a, Eliza erawh chuan a vai ve thung. Ngam leh inhawng takin an innuai tluan a, Eliza chuan panin vai chhuak viau thin mah se Ruatfela'n dik tha takin a vei leh ding chhuah zawnin a hnek let a, inbeitawk tak chungin Kawlkulh boxer a chungnung.
FIXTURE
Feb 14, Ningani 8:00pm - bout 11
LIGHTFLY - bout 4
F Lalnunsanga (Saithah) v JH Rosangpuia (Zemabawk North)
Malsawmtluanga (Chaltlang Lily Veng) v Lalmuanpuia (East Lungdar)
Gregor Joseph (Sailulak) v Menas Lalnunmawia (Phuldungsei)
HW Zomuansanga (Zawngin) v Lalramngheta (Sawleng)
BANTAM - bout 4
Zoremsiama (Seling) v Vanlalruatpuia (Saikhamakawn)
Johan Lalnunpuia (Sihfa) v Zoremsanga Royte (Mamit)
Robeinotlia (Siaha) v Isak Rosangpuia (Lunglei)
My Roken Sir (Venghnuai) v Lalrinawma (New Vervek)
LIGHT - bout 3
Lalhruaitluanga (Upper Republic) v Lalruatfela (Kepran)
Silver Lalropeka (Lawngtlai IV) v Isaac Lalpekhlua (Lunglei)
Lalhmangaihsanga (Khawzawl) v H Lalnunfela (Thuampui)