08 Feb 2019 12:33

inkhel

Yodha 4x4 Pick-up LPS Pro Fight Day 3 Results

Yodha 4x4 Pick-up LPS Pro Fight chu February ni 7, Ningani zan khan khelh chhunzawm leh a ni a,  inhnek vawi 12 a awm. 

February ni 7, Ningani Bout 12 Results

LIGHTFLY - bout 5

Lalhmingmawia (Saithah) bt KPA Samte (Teikhang)

= Technical Knockout (Round 1, minute 2:33)

An inthlau nghal a, Lalhmingmawia'n nawrin a vei leh dinga a hnek zawn hnuin a dawn leh siah a, KPA Samte a talbuai. Referee Rosema Colney chuan a chhiar a, inbei zui leh mah se Saithah boxer Hmingmawia'n hneh takin a nuai a, round khatna laihawlah Rosema'n inhnek a titawp.

Laltlanmawia (New Chalrang) bt Ngursangzuala (West Phaileng)

= Unanimous Decision (29-26, 28-27, 29-26)

An inhnek dun nghal bian bian a, a te zawk Laltlanmawia'n chiang takin a hnek fuh a, Ngursangzuala tluin referee Rosema Colney chuan a chhiar. Round hnihnaah Sangzuala che sual lehin a inven that loh avangin Tlanmawia'n a hnek tlu leh. Round hnuhnung berah Sangzuala a insiam tha a, tha takin bei let mah se hnehna a sual chhuak zo lo.

Lalremkima (Saikhamakawn) bt Lalhruaisanga (Sakawrdai)

= Technical Knockout (Round 3, second 1)

Saikhamakawn boxer Lalremkima'n a tir atangin inhnek a thunun a, chal sam tlem zuah sei bik Sakawrdai tlangval Lalhruaisanga che velin mipui a tihlim hle. Remkima'n a tuar tamin a chau hle a, round thumna tan a nih rualin a inhnukdawk.

Lalruatsanga (Khawzawl) bt Victor Lallianmawia (Vathuampui)

= Unanimous Decision (30-25, 30-25, 30-25)

Thiamna kawng hrang hranga tha zawk Khawzawl fighter Lalruatsanga'n round hmasa berah chhiar ngaiin vawi hnih a hnek tlu. Mahse, Vathuampui boxer Lallianmawia a tlawm duh bik lo va, a bet zawk ni chungin a tawp thlengin a ding tluan.

Francis Lalrinngheta (Edenthar) bt Lalnunfina (Bawngkawn)

= Technical Knockout (Round 1, minute 2:54)

Francis Lalrinngheta'n nuam ti takin a tir atangin a khel a, thiamna tlachham Lalninfina'n a chhang let thei lo va, tlan chhiain a inveng ringawt a, referee Lalrinhlui'n a chhiar. Inbei zui leh mah se Rinngheta'n a taksaah hnekin round khatna tawp hma lawkin Bawngkawn tlangval Nunfina a tlawm.

BANTAM - bout 4

Lalnunpuia Varte (Ramhlun North) bt VL Chhanchhuahkima (Sawleng)

= Knockout (Round 3, minute 1:31)

Kutthlak na leh thiamna pangngai tak nena khel Lalnunpuia Varte chuan vai fuh zawn nghalin VL Chhanchhuahakima a tlu nghal. Mahse, thahrui nei tak Chhanchhuahkima hian tuar nasa viau chungin ei takin a bei zel. Ramhlun North fighter Nunpuia'n round thumna laihawlah na takin a bekah a hnek tlu a, Chhanchhuahkima a tho chhuak thei lo.

Malsawmdawngliana (Kawrtethawveng) bt J Lalsiammawia (Zotlang)

= Unanimous Decision (29-28, 39-27, 29-28)

Thiamna an nei sang lo ve ve a, an inbei tawk hle. Malsawmdawngliana'n awmze neiin a hnek fo va, J Lalsiammawka'n nawr viau mah se hneh fuh mumal a nei lo va, hnek thiam zawk Dawngliana a dingchang hram.

Nazareth Lalthazuala (Zemabawk) bt R Vanlaltanpuia (Edenthar)

= Unanimous Decision (30-27, 30-27, 30-27)

Nazareth Lalthazuala taima takin a bei a, hnek chhuak tam zawk a nih chhawrin round tin a la. R Vanlaltanpuia a inveng nasa a, chakpui thamin a bei lo va, a hnek chhuak tam lo hle a ni.

Zairemmawia (East Lungdar) bt Lalremmawia Darlawng (Phunchawng)

= Unanimous Decision (30-27, 30-27, 29-28)

Ngam takin an inhmachhawn a, Zairemmawia'n a ding lamin a hmaiah chiang takin a hnek tlu. Referee R Lalbiaksangi'n a chhiar a, Lalremmawia Darlawng tho lehin tha pangngai takin bei zui tluam thei mah se chak turin a kir leh zo tawh lo.

LIGHT - bout - 3

K Lalzirmawia (Chhingchhip) bt Ricky Hmingthansanga (Luangmual)

= Unanimous Decision (29-27, 30-26, 29-27)

An inhnek nasa nghal hle a, hnek chhuak tam zawk K Lalzirmawia'n a dinhmun a siam. Ricky Hmingthansanga'n lang thama hnek fuh nei thin mah se a bet zawkah a tang a, a tawp lamah thahrui nei zawk Zirmawia langsar takin a chungnung.

Lalruatkima (Model Veng) bt Benjamin B Lalhmuliana (Hunthar)

= Knockout (Round 1, minute 2:55)

Model Veng boxer Lalruatkima'n thiamna kawng hrang hrangah Benjamin B Lalhmuliana a awpbet a, a tir atangin an inkhan lo. Ruatkima hian chhiar ngai khawpin vawi hnih a hnek a, a hnuhnung zawkah a veiin a hnek a, Hmuliana a hawihai a, a dingin a hmaiah a hneksak leh a, Hunthar tlangval tluin a tho zui lo.

Lalhmangaihsanga (Khawzawl) bt Moris Chawngthu (Lengpui)

= Majority Decision (29-27, 29-27, 28-28)

A tir atangin an inbei tawk tluan zak a, veikhawr Lalhmangaihsanga'n awmze neiin hnek fo mah se tharum nei zawk Moris Chawngthu chuan round hnihnaah a dingin a hmaiah a vai tlu a, referee Rochhingpuia'n a chhiar. An inbeih zui leh hnuah Hmangaihsanga tha takin a nawr let a, round thum chhungin hnek fuh tam zawk a ni a, a tluk avangin point khat paihsak ni mah se hnehna chang theiin a inlan.