Yodha 4x4 Pick-up LPS Pro Fight chu February ni 16, Inrinni zan khan khelh chhunzawm a ni a, inhnek vawi sawm pakhat a awm. February ni 18, Thawhtanni zan dar 8:00-ah chhunzawm leh a ni ang a, inhnek vawi sawm pakhat a awm leh ang.
Yodha 4x4 Pick-up LPS Pro Fight 2019 neih meka weight tina round of 16 lut zawng zawng, state dang boxer leh la khel lote pawh February ni 20, 2019 Nilaini zing dar 7:00-9:00 chhungin Hawla Indoor Stadium, Republic Vengthlangah inbuka medical test neih tur a ni a, heta inlan lo chuan an khel zui thei dawn lo
February ni 16, Inrinni zan Results
LIGHTFLY - bout 5
Fourth Round
Gregor Joseph (Sailulak) bt HW Zomuansanga (Zawngin)
= Walk over
HW Zomuansanga'n a kutah hliam a nei a, a inlan loh avangin inhnek hah lovin Gregor Joseph a chak.
Fifth Round (Experience Round)
JH Rosangpuia (Zemabawk North) bt Zakaria Lalneihpuia (Ramthar North)
= Unanimous Decision (30-27, 29-28, 30-27)
JH Rosangpuia'n a nawr hneh tluan zak a, tawn hriat nei huang atanga khel Zakaria Lalneihpuia talbuaiin awmze neiin a hnek let lo va, a khelh vawi khatnaah a tlawm nghal. Zemabawk North fighter Sangpuia'n thahrui a neiin a bawh buai hneh hle a, a hnek chhuak tamin a kut a rang a, phu takin round of 16 a lut. Zakaria-an lang thamin a hnek let zo lo va, a tanhmun a siam rem thei lo bawk a, kawng engkimah a bet zawkah a tang.
C Zosangmawia (Chaltlang) bt Lalhuapliana (Chawnpui)
= Unanimous Decision (29-28, 29-28, 29-28)
Tawn hriat nei huang atangin an vawi khat inlanna ve ve a ni a, C Zosangmawia'n round hnuhnung pahnih a thunun a, round of 16 a inhlangkai. Lalhuapliana'n nung takin bul a tan a, tha takin a hnek zawn a, lehlam invengin a bet. Mahse, Chaltlang boxer Sangmawia'n round hnihnaah a tanhmun siam thain mar leh tlang tha takin a hnek a, inhnaihchilhah a nuai hneh zawk bawk a, a tawp thlengin a hawi kir lo.
Lalpiangthara (Siaha) bt Lalhruaitluanga (Melriat)
= Unanimous Decision (30-27, 30-27,30-27)
Tharum leh thahrui nei zawk Lalpiangthara'n a hnek chhuak hnem a, round tin thununin amah ang bawka tawn hriat nei huanga mi Lalhruaitluanga hnehin round of 16 a lut. Siaha fighter Piangthara'n panin vawi thum vawi li vel a hnek zawn a, Hruaitluanga invengin a boruakah a ngam lo va, inhnek fuh langsar a tam lo va, hmuhnawm thamin an innuai zo lo va, inhnek fuh an harsat ve ve.
F Lalmuanzuala (Sihphir) bt Malsawmtluanga (Chaltlang Lily Veng)
= Split Decision (28-29, 30-27, 30-27)
Veikhawr F Lalmuanzuala'n a ngilin a vei lam a chhuah fuh fo va, Chaltlang Lily Veng rawlthar Malsawmtluanga lakah derthawng takin a tlang a, a thiam 16 zingah a intat lut. Tawn hriat nei huang atanga a khelh vawi khatnaah Muanzuala'n ngam takin a bei nghal a, boxer beiseiawm Sawmtluanga'n hnek let viau mah se tharum leh kawng hrang hrangah a khan lo deuh a, Muanzuala'n lang thamin a hnek fuh fo.
BANTAM - bout 4
Third Round
Lalrinawma (New Vervek) bt Zairemmawia (East Lungdar)
= Unanimous Decision (30-26, 29-27, 30-26)
My Roken Sir a hneh hnua a khelh hmasak ber tha pangngai takin New Vervek boxer Lalrinawma a inlan a, round hmasa berah Zairemmawia hnek tluin harsatna lian tawk lovin a chak a, thawhtanni zanah a khel leh ang. Tawn hriat nei lo huanga round hnuhnung ber a ni a, thiamna an nei sang tawk lo ve ve a, Remmawia'n a tawngpawng bawh viau a, a ke chheh a sual laiin Rinawma'n a hnek a, a tlu. Referee Lalngaihawma'n a chhiar a, inbei zui lehin a tawp thlengin Rinawma hnekin awmzia a nei zawk.
Fourth Round (Experience Round)
Vanlalruatpuia (Saikhamakawn) bt Simon Hlychho (Siaha)
= Unanimous Decision (30-27, 30-27, 30-27)
Tawn hriat nei lo huang atanga tlang Vanlalruatpuia'n tuan tha leh kut rang zawk a nihna hmangin Simon Hlychho a thunun a, round tin la vekin round of 16 a inhlangkai. A tir atanga a tawp thlengin Siaha fighter Simon-an a bei a, pan ngat ngatin vawi hnih thum vel hnek zawn thin mah se chet awlsam Ruatpuia'n a hnek zawn tamin a rang a, thiamna a hmang tam zawk bawk a, a chungnung.
Johan Lalnunpuia (Sihfa) bt Lalnunfela (Zanlawn)
= Unanimous Decision (30-27, 30-27, 30-27)
Inhnek boruak dul takah Johan Lalnunpuia'n awlsam takin tawn hriat nei huang atanga khel Lalnunfela a hneh. An inhnek nep viau a, tawn hriat nei lo huang atanga tlang Johan-a hnek a dikin a na zawk a, a nuai hneh bawk. Inveha inven a tam a, indinchilha inhnek zawn a awm mang lo. Nunfela'n hnehna chang turin a kuttum a chhuah zo lo va, a inlan hmasak berah tla nghalin Sihfa boxer-in round of 16 a inhlangkai ve thung.
Lalremsanga (Lungleng I) bt Isak Rosangpuia (Lunglei)
= Walk over
Harsatna a neih avangin tawn hriat nei lo huang atanga tlang chho Isak Rosangpuia a inlan lo va, khel hah miah lovin tawn hriat nei huanga mi Lalremsanga'n round of 16 a lut.
LIGHT - bout 2
Third Round
C Lalhruaitluanga (Mualpui, ITI) bt Sena Tuallawt)
= Technical Knockout (Round 1, minute 2:36)
C Lalhruaitluanga'n hneh takin a nuai a, vawi thum a hnek tluk hnuah technical knockout-in Sena Tuallawt a hneh a, a thiam 16 zingah a inhlangkai. Kawng engkimah Hruaitluanga a chungnung a, an inkhan lo hle. Thiamna tlachham Sena a inveng zo lo va, round hmasa berah chhiar ngaiin Hruaia'n vawi thum a hnek a, tho leh zel mah se a hnuhnung berah referee C Vanlalchhuanga'n inhnek a titawp.
Lalnunzawma bt Lalhmangaihsanga (Ramthar North)
= Split Decision (28-29, 29-28, 29-28)
Lalnunzawma'n a dinhmun siam hramin Lalhmangaihsanga lakah split decision-in a chak a, round of 16 a lut. Veikhawr ve ve an insu a, Bualpui NG fighter Nunzawma'n tharumah a ngam a, panin tlang takin a veiin a hnek thin a, Hmangaihsanga'n vai let fuh fo mah se kutthlak na zawk leh a nawrtu Nunzawma a langsar hret a, inhnehtawk takin an inbei tluan.
February ni 18, Thawhtanni zan 8:00 Bout 11 Fixtures
LIGHTFLY - bout 4 : Fifth Round (Experience Round)
Lalruatsanga (Khawzawl) v H Lalnunhlima (Tuipui)
Hmingthanmawia (GSA ITI Veng) v Lallawmawma (Lawngtlai)
Laltlanmawia (New Chalrang) v Lalchhuanmawia (Reiek)
Gregor Joseph v LH Zadingliana (Siaha)
BANTAM - bout 4 : Fourth Round (Experience Round)
Hmingchungnunga (Rawpui) v Lalrinngheta (Tuipui)
Lalramzauva (Muthi) v Vanlalzawna (Niawhtlang)
Henry Lalthazuala Chhangte (Chhipphir) v Lianmawia (Chhinga Veng)
Malsawmkima (Muthi) v Lalrinawma (New Vervek)
LIGHT - bout 2 : Third Round
Zonunzira (New Siaha) v Lalhruaitluanga (Upper Republic)
Lalruatkima (Model Veng) v Isaac Lalpekhlua (Lunglei)
MIDDLE - bout 1 : First Round
First Round
Isak Laltanpuia (Chaltlang) v T Lalbiaktluanga (Luangmual)