Yodha 4x4 Pick-up LPS Pro Fight chu February ni 18, Thawhtanni zan khan khel chhunzawm a ni a, ti hian round pangngai khelh zawh a ni. February ni 21, 2019  Ningani zanah Round of 16 khelh tan a ni ang a, state dang atanga tel tura sawm bikte an inlan tan ang. Round of 16 khel tur zawng zawng February ni 20, 2019 Nilaini zing dar 7-9 chhungin Hawla Indoor Stadium, Republic Vengthlangah inbuk tha leh vekin medical test an hmachhawn bawk ang.

February ni  18, Thawhtanni zan Results  Bout 11

LIGHTFLY - bout 4 : Fifth Round (Experience Round)

H Lalnunhlima (Tuipui) bt Lalruatsanga (Khawzawl)

= Unanimous Decision (30-26, 30-26, 30-26)

Tawn hriat nei huanga mi H Lalnunhlima inlan vawi khatna a ni a, kawng hrang hrangah Lalruatsanga a thunun thei a, round tin a la vek. Tuipui rawlthar Nunhlima hian panin rang leh mar taka a vei leh ding a chhuah zawn hmangin a tibuai a, vawi li vel hnek zawn nghalin Khawzawl boxer Ruatsanga'n a chhang let zo lo va, hnek ve nual mah se awmzia a nei tham lo.

Inven nan a kun fo avangin round hnihnaah tawn hriat nei lo huang atanga tlang kum 19 mi Ruatsanga point paihsak a ni. Round tawp berah kum 16 mi Nunhlima tlahniam deuh hlek mah se a dinhmun siam khawpin a hnek chhuak tho va, an kutchhuak a inthlau va, an chet vel danah langsar takin a chak.

Lallawmawma (Lawngtlai) bt Hmingthanmawia (GSA ITI Veng)

= Unanimous Decision (29-27, 30-26, 30-26)

Veikhawr Lallawmawma'n a ding lamin a hnek tlu nghal a, a hnuah fei takin Hmingthanmawia'n khel tluan mah se a bet zawkah a tang a, tawn hriat leh thiamna kawng hrang hrangah Lawngtlai fighter Lawmawma a chungnung.

A tirah Thanglailung tlangval Thanmawia'n ngam takin a nawr a, veikhawr Lawmawma'n hnek letin a ding lamin a khabeah a vai tlu a, referee Lalchhanhima Hnamte chuan chhiarin kum 17 mi Thanmawia a tho leh. Hnek tlu nawn tawh lo mah se kum 22 mi Lawmawma'n inhnek a awpbet zui a, hnek na leh mar zawk a nih bakah a kut a rang. GSA ITI hminga khel Thanmawia'n bei ngawrh hle mah se a ngam lo va, inhnek tawnah pawh Lawmawma a langsar zel.

Lalchhuanmawia (Reiek) bt Laltlanmawia (New Chalrang)

= Unanimous Decision (30-26, 30-26, 30-26)

A vawi khat khelhnaah Lalchhuanmawia'n awlsam takin tawn hriat nei lo huang atanga tlang Laltlanmawia a hneh a, round tinah a chungnung vek. Kum 24 mi Chhuanmawia hi inchi rukin New Chalrang tlangval Tlanmawia aiin a sang a, a ban seina chhawrin a ban phak atangin fuh tak takin a hnek.

Thiamna tlachham kum 24 mi Tlanmawia a che thei lo va, a theihna lantir turin a nawr bet zo lo va, tawlh kual pahin Reiek boxer-in a ngilin a hnek thin. Feet 4 leh inchi 11 tling lo Tlanmawia'n a hnek thleng pha mang lo va, inven nan a kun fo avangin round hnuhnung berah a point paihsak a ni nghe nghe.

Gregor Joseph (Sailulak) bt LH Zadingliana (Siaha)

= Unanimous Decision (30-26, 30-26, 30-26)

Sailulak fighter Gregor Joseph chuan tawn hriat nei huang atanga khel LH Zadingliana a nawr hneh a, round tinah langsar zawk vekin tawn hriat nei lo huang atangin a thiam 16 zingah a inhlangkai.

Kum 19 mi Joseph-a hian thahrui a nei a, a hnek chhuah a dikin a mar a, indinchilha an inhnekah thiamna hmang tamin a rang bawk. Round hnih atangin Kum 27 mi Dingliana khel a tlahniam a, mumal taka hnek chhuah a nei tam lo va, round hnuhnung berah a hnek dik loh fo avangin a point paihsak a ni.

BANTAM - bout 4 : Fourth Round (Experience Round)

Lalrinngheta (Tuipui) bt Hmingchungnunga (Rawpui)

= Unanimous Decision (30-27, 30-27, 30-27)

Tawn hriat bei huang atanga inlan Lalrinngheta'n nuam ti takin a khel a, a tawp lamah a hnek tam hle a, Rawpui tlangval Hmingchungnunga'n a do let hneh lo va, thiamna kawng hrang hrang a pha lo. A tir lamah an inhnek tawk viau na a, Tuipui rawlthar Rinngheta'n a dinhmun siam tha tial tialin a ngila a hnek bakah a vai fuh sak sak a, tawn hriat nei lo huang atanga tlang Hmingchungnunga a inven nasa telh telh.

Kum 16 mi Rinngheta'n round hnuhnung berah thui taka a ding lam a hnek chhuah hmangin a tibuai a, vawi nga hnek fuh zawnin kum 20 mi Hmingchungnunga tanhmun a phet viau a, mahse, tlu lovin a ding tluan.

Vanlalzawna (Niawhtlang) bt Lalramzauva (Muthi)

= Split Decision (27-30, 29-28, 29-28)

Vanlalzawna a pan tluan a, hnek chhuak tam zawk a nihna chhawrin Lalramzauva lakah a chak a, judge pathum erawh a hmin zo bik lo. Niawhtlang fighter Zawna khelh vawi khatna a ni a, tha taka invengin a pan a, vawi thum vel hnek chhuakin phui takin Muthi boxer Ramzauva a inveng bawk a, vawi hnih khat a hnek let.

A tir atanga a tawp thlengin an inkhelh dan a danglam lo va, kum 21 mi Zawna'n hnek chhuak tam zawk viau mah se langsar taka fuh a tam lo. Kum 22 mi Ramzauva'n a hnek let fuh zauh zauh a, mahse, a dinhmun siamna tur khawp a tling lo va, kawng hrang hrangah a bet zawk.

Henry Lalthazuala Chhangte (Chhipphir/GSA ITI) bt Lianmawia (Chhinga Veng)

= Knockout (Round 1, minute 2:30)

Chhipphir boxer Henry Lalthazuala Chhang chuan round khatnaah vawi hnih Lianmawia a hnek tlu a, a hnuhnung zawkah Chhinga Veng tlangval a ding chhuak thei tawh lo. Inhawng takin an innuai tawn a, GSA ITI hminga khel Thazuala'n a dulah hneksakin Lianmawia thingthiin a thu hniam. Referee Rosema Colney chuan chhiarin a tho chhuak leh.

Kum 19 mi Thazuala'n nawrin a vei leh dingin a bekah a vai fuh zawn a, kum 26 mi Lianmawia a tlo a, a tho zui thei tawh lo. Minute 2:30 chhungin Thazuala a chak a, tawn hriat nei lo huang atangin round of 16 a lut.

Malsawmkima (Muthi) bt Lalrinawma (New Vervek)

= Unanimous Decision (29-28, 30-27, 30-27)

Malsawmkima'n thiam nei tha zawk a nihna chhawrin Lalrinawma lakah harsatna liantham tawk lovin hnehna a chang. Muthi rawlthar hian tawlh kual paha dik taka a hnek fo bakah panin a ngilin a vei leh ding a chhuah zawn tha viau thin bawk a, New Vervek tlangval Rinawma'n a theihna hmang hle mah se a dawng hnem a, a chet danin mittlung zo lo.

Kum 15 mi Sawmkima'n kum kal ta atangin boxing a zir a, beiseiawm takin a khel mek a, a ruh erawh a la no deuh tih a kutchhuak leh a chet vel danah a lang. Kum 20 mi Rinawma'n My Roken Sir a hneh atangin hriat a hlawh phah a, boxing leh Pro Fight a khelh vawi khatna ni mah se chhinchhiahtlak takin hun a hmang.

LIGHT - bout 2 : Third Round

Zonunzira (New Siaha) bt Lalhruaitluanga (Upper Republic)

= Unanimous Decision (30-27, 30-27, 30-27)

New Siaha boxer Zonunzira'n a hnek tam hle a, tluk pumpelhin Lalhruaitluanga a ding tluan hram. Chet vel awlsam leh thiamna nei zawk kum 20 mi Nunzira'n amah aia kum ngaa upa Hruaitluanga a tawrhtir nasa a, round tinah vawi eng emaw zat a hnek.

Upper Republic fighter Hruaitluanga'n a panin Nunzira'n dik leh fuh takin a lo hnek zawn a, a lu leh taksaah vai leh a ngila a hnek bakah a dawm bawk. Hruaitluanga'n vawi hnih khat bak a hnek ve hman lo tiin eng emaw zat a hnek chhuak. Chuti chungin a tawp thlengin Hruaitluanga'n luhlul takin a pan a, nuam ti takin Nunzira a khel a, hnek tluk tumin bei viau thin mah se round thum chhungin Hruaitluanga a ding tluan.

Lalruatkima (Model Veng) bt Isaac Lalpekhlua (Lunglei)

= Knockout (Round 1, minute 2:19)

Model Veng fighter Lalruatkima'n a taksaah a hnek tlu a, minute 2:19 chhungin Lunglei rawlthar Isaac Lalpekhlua a knockout. Inveng takin Pekhlua'n a pan a, a tir lamah beiseiawm takin a hnek chhuak.

Kum 20 mi Ruatkima'n a dingin a nak vei lamah hnekin a vei lamin a nak ding lamah a hnek zui bawk. Kum 18 mi Pekhlua tluin na a ti hle a, a tho chhuak thei lo va, round khat khel tluan lovin Ruatkima a chak.

MIDDLE - bout 1 : First Round

T Lalbiaktluanga (Luangmual) bt Isak Laltanpuia (Chaltlang)

= Technical Knockout (Round 2, minute 2:10)

Tlu hmasa zawk T Lalbiaktluanga'n round hnihnaah hneh takin a nuai a, chhiar ngaia vawi hnih a awm hnuah Isak Laltanpuia'n a khelh zawm thei tawh lo. Thiamna an nei sang tawk lo ve ve a, a tir atangin inhawng takin an inhnek tawn a, an dawng hnem dun hle.

Round hmasa berah Chaltlang boxer Tanpuia'n a vei leh dingin a hmaiah a hnek zawn a, kum 33 mi Biaktluanga a tlu. Tho lehin round hnihnaah ropui takin Luangmual fighter a inlan. Ngam takin amah aia kum 13-a naupang a nuai a, a hmaiah vawi thum hnek zawnin Tanpuia a hawi buai. Referee Vulthavunga'n chhiarin an inbei zui leh a, Biaktluanga'n nawrin a hual chep a, a ding lamin chiang takin a dawm a, Vula'n chhiar lehin Tanpuia hmui a thi nasa hle a, inhnek a titawp.